حیدرآباد:ہندوستانی کرکٹ ٹیم کے تجربہ کار فاسٹ بالر محمد شامی اور ٹینس اسٹار ثانیہ مرزا کی شادی کے حوالے سے کچھ عرصے سے سوشل میڈیا پر چرچے ہیں۔ سوشل میڈیا پر آئے روز خبریں آتی رہتی ہیں کہ یہ دونوں شادی کرنے والے ہیں۔
اب ثانیہ مرزا کے والد نے ان خبروں پر اپنی خاموشی توڑ دی ہے جو سوشل میڈیا پر زور پکڑ رہی ہیں۔ ثانیہ کے والد عمران مرزا نے واضح کیا ہے کہ یہ تمام باتیں پوری طرح سے افواہیں ہیں۔
عمران مرزا نے کہا کہ یہ سب بکواس ہے۔ وہ اس سے کبھی ملا بھی نہیں۔ ثانیہ مرزا ان دنوں حج پر ہیں۔ چند روز قبل اسٹار کھلاڑی نے اپنے سوشل میڈیا اکاؤنٹ پر حج پر جانے کی معلومات پوسٹ کی تھیں۔ پاکستانی کرکٹر شعیب ملک کے ساتھ ثانیہ کی شادی تقریباً 5 ماہ قبل ختم ہوئی تھی۔ ان دونوں کا ایک بیٹا بھی ہے۔
انہوں نے کہاکہ دونوں میں طلاق ہو چکی ہے، شعیب نے دوسری شادی بھی کر لی ہے۔ ایسے میں ثانیہ کے والد نے واضح کیا ہے کہ شامی اور ثانیہ کی شادی کی بے بنیاد خبریں جو سوشل میڈیا پر پھیلائی جا رہی ہیں وہ محض افواہ ہیں۔
یہ بھی پڑھیں:ثانیہ مرزا اہل خانہ کے ساتھ سفرِ حج پر روانہ، خیر خواہوں سے دعاؤں کی اپیل
غور طلب ہے کہ محمد شامی نے سال 2018 میں اپنی اہلیہ حسین جہاں سے علیحدگی اختیار کر لی تھی۔ ان کی اہلیہ نے بھی شامی پر گھریلو تشدد سمیت کئی سنگین الزامات لگائے تھے۔اس وقت سے یہ دونوں الگ ہیں۔ اب محمد شامی اپنی زندگی میں آگے بڑھ چکے ہیں۔ ان دنوں وہ اپنی ایڑی کی چوٹ سے صحت یاب ہو رہے ہیں۔
