گیا:ریاست بہار کے ضلع گیا پولیس نے خاتون کے قتل معاملے کا انکشاف کر دیا ہے۔ خاتون کے بیٹے کے دوست ہی ملزم نکلے، آپس میں لڑائی کے بعد بدمعاش اسکے گھر گئے تھے جہاں ان دونوں نے لڑکے کی ماں کا قتل کردیا۔ پولیس نے اس معاملے میں محمد انظر اور موہت کمار کو گرفتار کیا ہے۔ ان پر الزام ہے گزشتہ روز گھر میں داخل ہوکر ان لوگوں نے خاتون کا گلا ریت کر قتل کر دیا تھا۔
ایس ایس پی آشیش بھارتی نے اپنے دفتر میں بتایا کہ گزشتہ 29 جون کو کوتوالی تھانہ کو اطلاع موصول ہوئی تھی کہ نئی گودام ٹی او پی کے پاس ایک گھر میں نامعلوم بدمعاشوں کے ذریعے ایک خاتون کا قتل کر دیا گیا ہے۔ تھانہ انچارج کوتوالی کے ذریعے یہ اطلاع افسران کو دی گئی۔ جس کے بعد ان کی ہدایت پر کوتوالی تھانہ کی پولیس نے جائے وردات پر پہنچ کر پورے معاملے کی جانچ کی اور لاش کو قبضے میں لے کر پوسٹ مارٹم کے لیے مگدھ میڈیکل ہسپتال بھیج دیا۔
اس تعلق سے تحریری درخواست بھی متوفیہ کے لواحقین کی طرف سے دی گئی اور اس میں دو لوگوں کو نامزد بھی کیا گیا تھا۔ انہوں نے بتایا کہ اس معاملے کو انہوں نے سنجیدگی سے لیتے ہوئے ایڈیشنل ایس پی کی قیادت میں ایس آئی ٹی تشکیل دے کر بدمعاشوں کی گرفتاری کو یقینی بنانے کے ہدایت دی گئی۔ قتل کے بعد جائے واردات کے معائنے کے دوران ایف ایس ایل کی ٹیم کے ذریعے واردات میں استعمال کیے گئے سرجیکل بلیڈ کو بھی برآمد کیا گیا تھا۔
