میرٹھ:ریاست اتر پردیش کے ضلع میرٹھ میں پرتا پور تھانہ علاقے میں واقع کاشی ٹول پلازہ پر گزشتہ روز ایک سنسی خیز معاملہ سامنے آیا ہے ۔ پرتاپور کے کاشی ٹول پلازہ پر فاسٹیگ میں بیلنس نہ ہونے کی وجہ سے ٹول پلازہ پر کام کرنے والی خاتون ملازمین نے گاڑی روک دی۔ اس دوران ٹول پلازہ کی سپروائزر منیشا چودھری گاڑی کے سامنے کھڑی ہو کر ڈرائیور سے ٹول کی رقم ادا کرنے کو کہا۔ اس کے بعد ملزم کار ڈرائیور منیشا کو سامنے سے ٹکر مارتے ہوئے اسے گھیسٹا۔منیشا کو شدید زخمی حالت میں ایک پرائیویٹ اسپتال میں داخل کرایا گیا۔
ٹول پلازہ پر ملازمہ پر گاڑی چڑھانے کا ویڈیو سوشل میڈیا وائرل ہونے کے بعد پولیس بھی حرکت میں آئی.کاشی ٹول پلازہ کے منیجر پرمود دھنکر کہتے ہیں۔
جس طرح ایک خاتون سپروائزر کو گاڑی نے ٹکر ماری وہ شرمناک ہے۔ ان کا کہنا ہے کہ محض 160 روپے کے لیے خاتون پر جان لیوا حملہ کیا گیا۔ اس پر جلد از جلد ایکشن لیا جائے۔ پولیس کو پورے معاملے کی سی سی ٹی وی فٹیج کی جانکاری دے دی گئی ہے ۔
اطلاع ملنے کے بعد پولیس موقع پر پہنچ گئی اور ٹول پلازہ پر نصب سی سی ٹی وی کیمروں سے ملزم کار ڈرائیور کی تلاش شروع کر دی۔ پرتاپور پولیس اسٹیشن کے انچارج جے کرن سنگھ نے بتایا کہ سی سی ٹی وی فوٹیج کی بنیاد پر کار کے نمبر کا پتہ لگانے کی کوشش کی جارہی ہے۔
