کرناٹک میں بنگلورو کے نارتھ ایسٹ ڈویژن کے سائبر کرائم سیل نے دو نابالغوں کو حراست میں لیا ہے، جبکہ ایک اور شخص کو گرفتار کیا ہے۔ یہ تینوں ملزمان سوشل میڈیا پر لڑکیوں اور نابالغوں کی تصاویر کو فحش شکل دے کر دوبارہ سوشل میڈیا پر پوسٹ کرتے تھے۔پولیس سے موصولہ اطلاع کے مطابق تینوں ملزمین کو بنگلورو کے باگلورو میں ملزم کے گھر سے گرفتار کیا گیا۔ تین ملزمان میں سے دو نابالغ ہیں، اس لیے انہیں جوونائل کورٹ میں پیش کیا گیا ہے۔ پولیس کا کہنا ہے کہ تینوں کے موبائل فون ضبط کر لیے گئے ہیں۔
پولیس کے مطابق حال ہی میں ملزم نے ایک نابالغ لڑکی کے انسٹاگرام اکاؤنٹ سے تصویر لی اور اسے فحش انداز میں تبدیل کیا۔ اس کے بعد اسے جعلی اکاؤنٹ پر پوسٹ کیا گیا۔ معاملہ سامنے آنے پر اس سلسلے میں شکایت درج کرائی گئی اور اس کی بنیاد پر ملزمان کو گرفتار کر لیا گیا۔
تینوں ملزمان میں سے ایک کالج میں پڑھتا ہے جبکہ باقی دو اسکول میں پڑھتے ہیں اور تینوں دوست ہیں۔ پولیس کا کہنا ہے کہ ملزم لڑکیوں کی تصاویر کھینچتا تھا، انہیں فحش انداز میں مورف کرتا تھا اور سوشل میڈیا پر پھیلاتا تھا۔ پولیس حکام نے مشورہ دیا ہے کہ والدین اپنے بچوں کو موبائل فون دینے سے پہلے سوچ لیں۔
