نئی دہلی: قومی دار الحکومت دہلی میں آج عام آدمی پارٹی کے رہنماوں اور کارکنوں کے ایک منصوبہ بند احتجاج سے پہلے دہلی پولیس نے حفاظتی اقدامات کو بڑھا دیا ہے۔ جمعرات کو انفورسمنٹ ڈائریکٹوریٹ (ای ڈی) کے ذریعہ پارٹی کے سپریمو اور دہلی کے وزیر اعلی اروند کیجریوال کی گرفتاری کے خلاف عام آدمی پارٹی نے کینڈل مارچ نکالنے اور بی جے پی حکومت کا پتلہ جلانے کا اعلان کیا تھا۔
ایک سینئر پولیس افسر نے کہا کہ "ہمیں اطلاع ملی ہے کہ عام آدمی پارٹی کے کارکنان اور رہنما احتجاج کریں گے۔ امن و امان کی صورتحال کو یقینی بنانے کے لئے ہم نے قومی دارالحکومت میں سیکورٹی بڑھا دی ہے۔ ہم دہلی پولیس کے اہلکاروں کے ساتھ نیم فوجی دستوں کی تعیناتی کو یقینی بنائیں گے"۔ افسر نے مزید کہا کہ ''سینئر افسران اپنے اضلاع کی تمام صورتحال پر نظر رکھیں۔ ایس ایچ اوز کو ہدایات جاری کی گئی ہیں کہ وہ اپنے علاقے میں کڑی نظر رکھیں اور اگر وہ کسی احتجاج کے بارے میں جانیں تو اپنے سینئر افسران کو فوری طور پر مطلع کریں"۔
بی جے پی کے ہیڈکوارٹر، آئی ٹی او اور ای ڈی آفس کے سامنے جانے والی سڑکوں پر فورسز کو تعینات کیا گیا ہے جہاں عام آدمی پارٹی کے ارکان وزیر اعلیٰ کیجریوال کی گرفتاری کے خلاف احتجاج کرنے کے لیے جمع ہونے کی توقع ہے۔ پولیس افسر نے مزید کہا کہ انہوں نے ٹریفک پولیس سے کہا ہے کہ وہ دہلی میں ٹریفک کی روانی کو یقینی بنائیں اور اگر عام آدمی پارٹی کے کارکنان اور لیڈر احتجاجی مارچ نکالتے ہیں تو فوری طور پر ڈائیورشن کا انتظام کریں۔ مرکزی دہلی میں بی جے پی کے ہیڈکوارٹر اور ای ڈی کے دفتر کی طرف جانے والی سڑکوں کو بند کر دیا گیا ہے۔
یہ بھی پڑھیں:
- دہلی میں عآپ کا دفتر سیل کر دیا گیا، معاملہ الیکشن کمیشن کے ساتھ اٹھایا جائے گا: آتشی
- کیجریوال جیل سے حکومت نہیں چلا سکتے، صدر راج لگ سکتا ہے: ماہرین
- اروند کیجریوال کو 28 مارچ تک ریمانڈ پر بھیجا گیا
- کیجریوال کو ای ڈی کی حراست میں بیوی، پرائیویٹ سکریٹری اور وکیل سے روزانہ ملنے کی اجازت
واضح رہے کہ 21 مارچ کو دہلی کے وزیراعلی اروند کیجروال کو ای ڈی نے دہلی شراب پالیسی معاملے میں گرفتار کیا جس کے بعد انہیں سات دن ای ڈی کی تحویل میں بھیج دیا گیا۔ کیجروال کی گرفتاری کے خلاف عام آدمی پارٹی لگاتار احتجاج کررہی ہے۔ گذشتہ روز انڈیا بلاک کی جانب سے بھی شہیدی پارک پر احتجاج کیا گیا تھا۔
