کولکاتا: مغربی بنگال کے دارالحکومت کولکاتا کے قریب مسلم اکثریتی علاقہ گارڈن ریچ کے 134 نمبر وارڈ میں واقع ایک پانچ منزلہ عمارت بستی پر گر پڑی۔ نصف درجن جھونپڑیاں اس کی زد میں آ گئی ہیں۔ اس واقعے میں دو لوگوں کی موت ہوئی ہے جب کہ دیگر افراد ملبے میں دب گئے ہیں۔ اب تک دس افراد کو بچا لیا گیا ہے، امدادی کام جاری ہے۔ زخمیوں کو ایس ایس کے ایم ہسپتال میں داخل کرایا گیا ہے۔
اس واقعے کی اطلاع پا کر وزیراعلیٰ ممتابنرجی جائے وقوع پر پہنچ کر حالات کا جائزہ لیا۔ وزیراعلیٰ ممتابنرجی نے کہا کہ مجھے پتہ چلا ہے کہ یہ عمارت غیر قانونی تھی۔ پورے معاملے کی تفتیش کی جا رہی ہے۔ متعلقہ حکمہ کو اس کی جانچ کی ہدایت دی گئی ہے۔ دوسری طرف کولکاتا میونسپل کارپوریشن کے مئیر فرہاد حکیم نے کہا کہ میں اور وزیر دمکل سجیت بوس نے واقعہ کی اطلاع ملتے ہی جائے وقوع پر پینچ کر حالات کا جائزہ لیا۔ ملبے میں دبے افراد کو نکالنے کا کام جاری ہے۔
یہ بھی پڑھیں: ممتا بنرجی کو علاج کے بعد ڈسچارج کر دیا گیا، تمام رہنماؤں نے ان کی جلد صحت یابی کی دعا کی
انہوں نے یہ بھی کہا کہ میں نے وزیر اعلیٰ سے بات کی ہے۔ مرنے والوں کے رشتہ داروں کو پانچ پانچ لاکھ روپے دیے جائیں گے۔ زخمیوں کو ایک ایک لاکھ روپے دیے جائیں گے۔ وزیتر سجیت بوس، کولکاتا کے پولیس کمشنر ونیت کمار گوئل نے جائے واقوع کا دورہ کیا۔
