گیا: بہار سے حج آپریشن 2024 کا اختتام ہو گیا ہے۔ اس بار بھی پٹنہ حج بھون سے لے کر گیا امبارکیشن پوائنٹ تک ایک دو معمولی کمی اور معاملے کو چھوڑ کر بقیہ بہتر انتظامات تھے۔ لیکن اس بار بھی کمیوں سے زیادہ بہار حج بھون اور حج کمیٹی کی تنقید حاجیوں کی ہر سال کم ہورہی تعداد کو لیکر ہوئی ہے۔
حج آپریشن 2024 میں کل تعداد میں 2023 کے بنسبت نصف فیصد کی کمی آئی جبکہ بہار سے ہی پرواز کی تعداد میں نمایاں کمی ہے، گزشتہ برس 3200 حجاج کی پرواز گیا ہوائی اڈہ سے ہوئی تھی۔ وہیں اس بار 2024 میں گیا ہوائی اڈہ سے صرف 967 حاجیوں کی پرواز اور واپسی ہوئی ہے۔ تعداد میں نمایاں کمی کے تعلق سے سوال اٹھنے پر چیئر مین عبد الحق نے بھی تسلیم کیا کہ واقعی بہار کا کوٹہ خالی رہ جاتا ہے۔
انہوں نے کہا کہ اس بار ابھی سے یعنی کہ محرم بعد سے مسلمانوں کے درمیان ' حج بیداری مہم ' شروع کردی جائے گی۔ علماء اور مشائخ عظام اور دانشوروں سے بیداری مہم میں مدد لی جائے گی۔ لوگوں کو زیادہ سے زیادہ تعداد میں سفرحج پرروانہ ہوں اسکے لیے ترغیبی پروگرام ہونگے۔ صاحب استطاعت سے براہ راست رابطہ بھی کیا جائے گا۔
دس ہزار کوٹہ میں پانچ ہزار بھی درخواست نہیں ملتی
بہار کے لیے قریب 10 کوٹہ مختص ہے۔ لیکن گزشتہ کئی برسوں سے حجاج کرام کی تعداد 6 ہزار سے کم ہی ہوتی ہے جو سفر حج پرروانہ ہوتے ہیں۔ اس برس 2024 میں پورے بہار سے صرف 3820 درخواستیں موصول ہوئی تھیں۔ ان میں بھی صرف 967 ہی حجاج تھے جنہوں نے اپنا امبارکیشن پوائنٹ گیا کو منتخب کیا تھا۔ جبکہ بقیہ نے دیگر اور 9 امبارکیشن پوائنٹ کو اپنی پرواز کے لیے پوائنٹ منتخب کیا تھا، حاجیوں کم تعداد ہونے کی وجہ سے اس بار سب سے زیادہ مہنگا گیا امبارکیشن پوائنٹ ہی رہاہے۔ یہاں سے جانے والے حاجیوں کو 4 لاکھ 20 ہزار سے زیادہ رقم ادا کرنی پڑی ہے۔
دو امبارکیشن پوائنٹ کو منتخب کرنے کی ہو اجازت
ریاستی حج کمیٹی کے چیئرمین عبد الحق نے کہاکہ اس بار 2024 کے لیے حج بھون پٹنہ کے پاس 3820 درخواستیں پورے بہار سے آئی تھیں۔ اس میں جو حاجی ہمارے گئے ہیں وہ 10 امباکیشن پوائنٹ سے گئے تھے۔ آئندہ آنے والے حج 2025 کے لیے ہمیں بھارت سرکار اور حج کمیٹی آف انڈیا سے یہی گزارش ہوگی کہ پہلے سے ہر ریاست کے لئے صرف دو امبار کیشن پوائنٹ طے کیا جائے۔
حاجیوں کو جانے میں آسانی ہو اور حج بھون کے لیے بھی سہولت ہو۔ کیونکہ پریشانی یہ ہوتی ہے کہ حج درخواست بہار سے بھرتے ہیں اور امبار کیشن پوائنٹ کوئی حاجی ممبئی، بنگلور، حیدرآباد، دلی، لکھنوء اور دیگر امبارکیشن پوائنٹ منتخب کر لیتے ہیں۔ ہم لوگوں کے لیے بھی وہاں پر جا کر انتظام کرنے اور مینیج کرنے میں کافی پریشانی ہوتی ہے۔
عمرہ کرنے والوں کی تعداد بڑھی ہے
چیئرمین عبد الحق نے کہاکہ جیسا کہ ہر سال ہم لوگ دیکھتے ہیں کہ بہار سے ہمارے ہر سال کوٹہ کم ہو رہے ہیں۔ اسکی وجہ یہ ہے کہ لوگ عمرہ کو کافی عام کر چکے ہیں۔ عمرہ کے اوپر میں کم پیسے خرچ ہو رہے ہیں تو لوگ اس کو ایک اہم فرض کے طور پہ دیکھ رہے ہیں۔ لوگ عمرہ کو ہی ترجیح دے رہے ہیں۔
یہ بھی پڑھیں:گیا ایئرپورٹ پر حاجیوں کے آخری قافلے کی آمد کے ساتھ ہی حج آپریشن 2024 کا اختتام
پہلے یہ سمجھنا چاہیے ان کے اوپر حج فرض ہے تو وہ پہلے حج ادا کریں اور اس بار ہماری پوری کوشش ہوگی کہ حج 2025 کے لیے ہم زیادہ سے زیادہ لوگوں کو حج کے لیے تیار کریں۔ بہار حکومت کی جانب سے بہتر سے بہتر انتظامات کرائے جائیں گے اور کوشش ہوگی کہ یہاں سے بھی جانے والوں کے اخرجات کم ہوں۔
