مظفرنگر: گزشتہ روز سپریم کورٹ کے نیم پلیٹ معاملے میں دیے گئے فیصلے پر بھارتیہ کسان یونین کے قومی صدر چودری نریش ٹکیت نے بڑا بیان دیتے ہوئے کہا کہ ہم نے تو حکومت کی ہدایت کی شروع سے ہی مخالفت کی ہے۔ اس طرح کا فرمان نہیں دیا جاسکتا ہے۔ کسی دکان یا کسی مقام پر اس طرح کی نیم پلیٹ نہیں لگائی جاسکتی ہے۔
انہوں نے کہاکہ سپریم کورٹ کا اس معاملے میں جو فیصلہ آیا ہے اسے پورے ملک نے خیر مقدم کیا ہے۔ ہم سپریم کورٹ کے اس فیصلے کا تہہ دل سے استقبال کرتے ہیں۔ حکومت کو اس طرح کے متنازعہ فرمان جاری نہیں کرنے چاہیے جو ایک پرانی روایت چلی آ رہی ہے تو اسی کو چلنے دیں۔چھیڑ چھاڑ نہ کریں۔
یہ بھی پڑھیں:سپریم کورٹ کے فیصلے کے بعد مظفر نگر پھل فروشوں اور دکان داروں میں خوشی کی لہر
ان کا مزید کہنا تھا کہ کانوڑ یاترا میں مسلم معاشرے کا 75 فیصد تعاون رہتا ہے۔ اس لیے کانوڑ یاترا میں مسلمانوں کو نظرانداز نہیں کرنا چاہیے۔ کسی کے روزگار کو نہیں چھیننا چاہیے ۔ہم تو 2013 کے فساد کا سامنا کر چکے ہیں۔ بڑی مشکل سے عام لوگوں کی زندگی دوبارہ پٹری پر لوٹ پاتی ہے۔انہوں نے کہا کہ 26 جولائی کو سپریم کورٹ میں اس معاملے کو لے کر سماعت ہونے والی ہے امید کرتے ہیں کہ فیصلہ عوام کے حق میں آئے گا۔اس دن نیم پلیٹ پر مکمل طور پر پابندی لگ سکتی ہے۔
