نیویارک: آئی سی سی مینز ٹی ٹوئنٹی ورلڈکپ میں امریکہ نے پاکستان کو سپر اوور میں شکست دے کر بڑی کامیابی اپنے نام کر لی ہے۔ ایونٹ میں یہ امریکہ کی لگاتار دوسری کامیابی ہے۔
مقابلہ کافی دلچسپ رہا، امریکہ نے سپر اوور میں پاکستان کو جیت کیلئے 19 رنز کا ہدف دیا، لیکن پاکستان صرف 13 رنز ہی بناسکی۔ امریکہ کے ڈیلس میں گروپ اے کے مقابلے میں امریکہ نے ٹاس جیت کر گیند بازی کا فیصلہ کیا۔ امریکی کپتان مونانک پٹیل نے ٹاس جیت کر پاکستان کو پہلے بلے بازی کی دعوت دی۔
کپتان بابر اعظم نے 44 اور شاداب نے 40 رنز بنا کر اچھے کھیل کا مظاہرہ کیا۔ پاکستان نے مقررہ 20 اوورز میں 7 وکٹوں کے نقصان پر 159 رنز بنائے۔
امریکہ کو میچ جیتنے کے لیے آخری گیند پر 5 رنز درکار تھے، امریکی بلے باز نتیش کمار نے حارث رؤف کی گیند پر چوکا مارا اور میچ برابر کر دیا۔ امریکہ کے خلاف پاکستان کو ابتدا ہی میں مشکلات درپیش آئیں، پاکستانی ٹیم کے 3 ٹاپ آرڈر کے بلے باز پاورر پلے میں 26 رنز کے مجموعی اسکور پر آؤٹ ہو گئے۔
محمد رضوان صرف 9 رن، عثمان خان 3 رن اور فخر زمان 11 رنز بناکر پویلین لوٹ گئے، جبکہ شاداب نے شاندار بلے بازی کا مظاہرہ کرتے ہوئے 40 رنز بنائے۔ اعظم خان صفر پر آؤٹ ہوئے۔
شاداب کے علاوہ بابر اعظم نے اچھی بلے بازی کا مظاہرہ کیا اور 43 گیندوں پر 44 رنز بناکر آؤٹ ہوئے، جبکہ افتخار احمد 18 رنز ہی بناسکے۔ آخری اوورز میں شاہین آفریدی نے ٹیم کے اسکور کو بڑھانے میں مدد کی۔ انھوں نے 16 گیندوں پر 23 رنز بنائے اور ناٹ آوٹ رہے۔ امریکہ کی جانب سے نوتوش کینجی نے 3 کھلاڑیوں کو آؤٹ کیا، سوراب نے 2 ، علی خان نے ایک وکٹ لی۔
