نئی دہلی: پیرس اولمپکس 2024 میں بھارت کی مہم 6 تمغوں کے ساتھ ختم ہوگئی ہے۔ بدھ کے روز بھارتی ٹیم کی ایک اور تمغہ حاصل کرنے کی امید اس وقت ختم ہوگئی جب کھیلوں کی ثالثی عدالت نے ونیش پھوگاٹ کی مشترکہ تمغہ دینے کی اپیل کو مسترد کردیا۔
اس کے بعد آج یوم آزادی کے موقع پر وزیراعظم نریندر مودی نے پیرس اولمپکس میں شاندار کارکردگی کا مظاہرہ کرنے والے تمام کھلاڑیوں سے پی ایم ہاوس میں ملاقات کی۔ تمام کھلاڑیوں سے ملاقات کے بعد پی ایم مودی نے ان سے خطاب بھی کیا۔
اس موقع پر پی ایم مودی نے ہر اس ایک کھلاڑی سے ملاقات کی جسنے تمغہ جیتا۔ تاہم سلور میڈلسٹ نیرج چوپڑا بھارت میں نہ ہونے کی وجہ سے اس میٹنگ میں شرکت نہیں کر سکے۔ اس کے علاوہ اسٹار شٹلر پی وی سندھو اور اسٹار پہلوان ونیش پھوگاٹ بھی اس میٹنگ میں شریک نہیں ہوسکیں۔
اس دوران بھارتی کوئین پسٹل منو بھاکر پی ایم مودی کو پستول کے بارے میں بتاتے ہوئے نظر آئیں۔ اس کے بعد انہوں نے پی ایم مودی کو ایک پستول بھی بطور ہدیہ پیش کیا۔
پی ایم مودی نے ہاکی ٹیم کے کپتان ہرمن پریت اور سریجیش کے ساتھ ایک مشترکہ تصویر بھی بنوائی۔ بھارتی ہاکی ٹیم نے وزیر اعظم کو ہاکی اسٹکس کے ساتھ تمام کھلاڑیوں کے دستخط شدہ جرسی بھی تحفے میں پیش کی۔ بھارتی ہاکی ٹیم کے گول کیپر پی آر سریجیش نے ہاکی کو الوداع کہہ دیا ہے۔
واضح رہے کہ بھارت نے پیرس اولمپکس میں کل 6 تمغے جیتے ہیں۔ منو بھاکر نے 10 میٹر ایئر پسٹل مقابلے میں بھارت کا پہلا کاسنے کا تمغہ دلایا، اس کے بعد انہوں نے سربجوت سنگھ کے ساتھ ٹیم ایونٹ میں دوسرا تمغہ جیتا۔ امن سہراوت نے ریسلنگ میں بھارت کے لیے کانسے کا تمغہ جیتا، ہاکی ٹیم نے بھی 52 سال بعد لگاتار دو میڈلز جیت کر تاریخ دہرائی ہے۔ اس کے علاوہ نیرج چوپڑا نے اس سال چاندی کا تمغہ جیتا ہے۔ سوپنل کسالے نے 50 میٹر شوٹنگ ایونٹ میں کانسے کا تمغہ جیت کر تاریخ رقم کی۔
