ممبئی: ہاردک پانڈیا کی قیادت میں پہلے دو میچوں میں شکست کا سامنا کرنے والی ممبئی انڈینس پیر کو اپنے ہوم گراؤنڈ پر فارم میں چل رہی راجستھان رائلز سے ہارنے کے سلسلے کو ختم کرنا چاہے گی۔
ممبئی آئی پی ایل میں اپنی سست شروعات کے لیے جانا جاتا ہے اور پانڈیا کے کپتان بننے کے بعد بھی اس میں کوئی تبدیلی نہیں آئی ہے۔
ممبئی انڈینز کو پانچ ٹائٹل جتوانے والے روہت شرما کی جگہ پانڈیا کو کپتان بنانے کا فیصلہ شائقین کے لیے اچھا نہیں رہا اور آل راؤنڈر کو ابتدائی میچوں میں تماشائیوں کی طرف سے زبردست ہوٹنگ کا بھی سامنا کرنا پڑا۔
ممبئی انڈینز کو سیزن کے پہلے میچ میں پانڈیا کی سابق ٹیم گجرات ٹائٹنز کے ہاتھوں چھ رنز سے شکست کا سامنا کرنا پڑا تھا، جب کہ حیدرآباد میں ریکارڈ ہائی اسکور والے میچ میں سن رائزرز حیدرآباد نے انہیں 32 رنز سے شکست دی تھی۔ ان دو شکستوں کے بعد ٹیم پوائنٹس ٹیبل میں سب سے نیچے 10ویں نمبر پر ہے۔
اگرچہ یہ آئی پی ایل کے 17 ویں سیزن کا ابتدائی مرحلہ ہے، لیکن ممبئی کی ٹیم ہارنے کا سلسلہ ختم کرنا چاہے گی اور اپنے نیٹ رن ریٹ (-0.925) کو بھی بہتر کرنا چاہے گی۔
ممبئی کو اپنے تجربہ کار کھلاڑی سوریہ کمار یادو کی کمی محسوس ہو رہی ہے جو ابھی انجری سے صحت یاب ہو رہے ہیں۔ دونوں ٹیموں کے درمیان گزشتہ پانچ میچوں میں ممبئی کی ٹیم چار جیت درج کرنے میں کامیاب رہی ہے لیکن سنجو سیمسن کی قیادت والی راجستھان رائلز نے اس سیزن میں اب تک شاندار کارکردگی کا مظاہرہ کیا ہے۔ ٹیم نے اپنے دونوں میچ جیتے ہیں اور اس دوران اس کے بیشتر کھلاڑیوں کی کارکردگی اچھی رہی ہے۔
روہت بڑی اننگز کھیلنے کے لیے بے چین ہوں گے لیکن ممبئی کی ٹیم میدان میں پانڈیا سے بہتر فیصلوں کی امید رکھے گی۔ پانڈیا نے ابھی تک تیز گیند باز بمراہ کو بہتر طریقے سے استعمال نہیں کیا ہے۔ بمراہ اور پیوش چاولہ ممبئی کے باؤلنگ اٹیک میں تجربہ لاتے ہیں، جس نے مقامی کھلاڑی شمس ملانی پر بھی اعتماد ظاہر کیا ہے۔ ملانی آئی پی ایل میں نئے کھلاڑی ہیں لیکن انہیں وانکھیڑے اسٹیڈیم میں کھیلنے کا کافی تجربہ ہے۔
نوجوان فاسٹ بولر کوینا مفاکا سن رائزرس حیدرآباد کے خلاف کافی مہنگے ثابت ہوئے تھے، لیکن اس 17 سالہ جنوبی افریقی بولر کے لیے اس سطح پر موقع ملنا بڑی بات ہے۔
راجستھان رائلز نے اب تک شاندار کارکردگی کا مظاہرہ کیا ہے۔ سیمسن آئی پی ایل کے ابتدائی مرحلے میں زبردست فارم میں ہیں۔انتہائی باصلاحیت یشسوی جیسوال اس سیزن میں اپنا پہلا بڑا اسکور بنانے کے لیے بے تاب ہوں گے۔
جیسوال اپنے ہوم گراؤنڈ پر لوٹ رہے ہیں، جہاں انہوں نے دونوں ٹیموں کے درمیان کھیلے گئے آخری میچ میں 62 گیندوں میں 124 رنز کی طوفانی اننگز کھیلی تھی۔ تاہم اس میچ میں ان کی ٹیم کو شکست کا منہ دیکھنا پڑا تھا۔
مڈل آرڈر میں ریان پراگ پر اعتماد دکھانا راجستھان کے لیے اچھا ثابت ہو رہا ہے۔ ممبئی کے لیے تلک ورما، ٹم ڈیوڈ اور نمن دھیر اپنی شروعات کو بڑی اننگز میں تبدیل کرنا چاہیں گے۔
راجستھان کا بیٹنگ آرڈر لمبا ہے جس میں خطرناک جوس بٹلر ٹاپ پر ہیں اور وکٹ کیپر بلے باز دھرو جریل آخری اوورز میں تیز رنز بنانے کے ذمہ دار ہوں گے۔ جہاں ناندرے برگر نے باؤلنگ میں تجربہ کار ٹرینٹ بولٹ کے ساتھ بہت متاثر کیا ہے۔
راجستھان ٹیم کے پاس اسپن بولنگ میں انتہائی تجربہ کار روی چندرن اشون اور یوزویندر چہل کا آپشن ہے۔اویش خان اور سندیپ شرما کی تیز گیند باز جوڑی بھی اب تک متاثر کرنے میں کامیاب رہی ہے۔
دونوں ٹیموں کے ممکنہ پلیئنگ الیون:
ممبئی انڈینز: ہاردک پانڈیا (کپتان)، روہت شرما، جسپریت بمراہ، پیوش چاولہ، جیرالڈ کوٹزی، ٹم ڈیوڈ، ایشان کشن، کوینا مفاکا، محمد نبی، شمس ملانی، تلک ورما۔
راجستھان رائلز: سنجو سیمسن (کپتان)، اویش خان، دھرو جورل، جوس بٹلر، ناندرے برجر، روی چندرن اشون، ریان پیراگ، سندیپ شرما، شمرون ہیٹمائر، ٹرینٹ بولٹ، یشسوی جیسوال، یوزویندر چہل۔
