حیدرآباد: بی سی سی آئی نے ایک پریس ریلیز جاری کرکے اعلان کیا ہے کہ آئی پی ایل 2024 کے سترہویں سیزن میں راجستھان بمقابلہ کولکتہ نائٹ رائیڈرز کے درمیان 17 اپریل کو کھیلے جانے والا میچ اب 16 اپریل کو کھیلا جائے گا۔
آئی پی ایل نے ایک سرکاری بیان میں کہا کہ کولکتہ نائٹ رائیڈرز اور راجستھان رائلز کے درمیان میچ، جو پہلے 17 اپریل 2024 کو ایڈن گارڈنز، کولکتہ میں کھیلا جانا تھا، اب ایک دن پہلے 16 اپریل 2024 کو کھیلا جائے گا۔ اس میں یہ بھی کہا گیا ہے کہ گجرات ٹائٹنز اور دہلی کیپٹلس کے درمیان جو میچ 16 اپریل 2024 کو کھیلا جانا تھا، اب وہ 17 اپریل کو کھیلا جائے گا۔
چونکہ 17 اپریل کو رام نومی کا دن ہے اور کولکتہ پولیس رام نومی کے دن سکیورٹی فراہم کرنے کی پوزیشن میں نہیں ہے۔ ملک میں رام نومی کا تہوار خوشی و مسرت کے ساتھ منایا جاتا ہے، اس لیے پولس کی پوری توجہ اس پر مرکوز رہے گی۔
کرکٹ ایسوسی ایشن آف بنگال (سی اے بی) کی جانب سے بی سی سی آئی کو خط لکھ کر رام نومی کی وجہ سے کولکتہ میں 17 تاریخ کے میچ کو دوبارہ شیڈول کرنے کی درخواست کی گئی تھی۔
آئی پی ایل کا 17 واں سیزن اس وقت ملک کے مختلف مقامات پر کھیلا جا رہا ہے۔ راجستھان رائلز تین جیت کے ساتھ پوائنٹس ٹیبل پر سرفہرست ہے جبکہ ممبئی انڈینز جو پانچ بار لیگ جیت چکی ہے سب سے نیچے ہے۔
یہ بھی پڑھیں: کے کے آر اور راجستھان کے درمیان 17 اپریل کو ہونے والے میچ کی تاریخ میں تبدیلی کا امکان
