حیدرآباد: بھارتی کرکٹ ٹیم ٹی ٹوئنٹی ورلڈ کپ 2024 کے فوراً بعد زمبابوے کا دورہ کرنے جا رہی ہے۔ یہ معلومات کرکٹ زمبابوے کے آفیشل سوشل میڈیا اکاؤنٹ سے سامنے آئی ہیں۔ پانچ ٹی ٹوئنٹی میچوں کی سیریز کا پہلا میچ 6 جولائی اور آخری پانچواں میچ 14 جولائی کو زمبابوے کے شہر ہرارے میں کھیلا جائے گا۔
زمبابوے کرکٹ کے مطابق اس بات کی تصدیق بھارتی کرکٹ بورڈ کے ساتھ بات چیت کے بعد کی گئی ہے۔ جس کا بنیادی مقصد دو طرفہ تعلقات کو مضبوط بنانا اور دونوں کرکٹ بورڈز کے درمیان تعاون کے جذبے کو فروغ دینا ہے۔
زمبابوے کرکٹ کے صدر نے کہا کہ 'ہم جولائی میں ٹی ٹوئنٹی سیریز کے لیے بھارت کی میزبانی کرنے کے لیے بالکل پرجوش ہیں، یہ اس سال گھریلو سرزمین پر ہماری سب سے بڑی بین الاقوامی کشش ہوگی۔
زمبابوے کرکٹ کی طرف سے جاری کردہ پریس ریلیز کے مطابق، بی سی سی آئی کے سکریٹری جے شاہ نے کہا کہ بی سی سی آئی نے ہمیشہ عالمی کرکٹ برادری میں اپنا حصہ ڈالنے میں اہم کردار ادا کیا ہے۔ ہم سمجھتے ہیں کہ یہ زمبابوے کی تعمیر نو کا دور ہے اور اس وقت زمبابوے کرکٹ کو ہمارے تعاون کی ضرورت ہے۔
انھوں نے مزید کہا کہ دیگر تمام ممبر بورڈز کا دورہ کرنے اور ان کی حمایت کرنے کا ہمارا عزم ہمارے فلسفے کے مطابق ہے۔ بی سی سی آئی دو طرفہ کرکٹ کو مضبوط اور عملی بنانے کی پوری کوشش کرے گا۔
واضح رہے کہ بھارت اس وقت انگلینڈ کے ساتھ پانچ ٹیسٹ میچوں کی سیریز کھیل رہا ہے۔ سیریز کا تیسرا میچ 15 فروری سے راجکوٹ میں کھیلا جائے گا۔ سیریز میں اب تک دونوں ٹیمیں 1-1 سے برابر پر ہیں۔ زمبابوے سیریز سے قبل ٹی ٹوئنٹی ورلڈ کپ کا انعقاد کیا جانا ہے جس کا پہلا میچ 2 جون اور آخری میچ 29 جون کو کھیلا جائے گا۔
