نیویارک: پاکستان کے سابق کرکٹر کامران اکمل نے ہندوستانی فاسٹ بالر ارشدیپ سنگھ کے بارے میں متنازع ریمارکس کے بعد عوامی سطح پر معافی مانگ لی ہے۔ پاکستان کے سابق کرکٹر کامران اکمل کو اپنے تبصرے کے بعد سوشل میڈیا پر شدید غم و غصے کا سامنا کرنا پڑا۔ اے آر وائی نیوز پر پینل ڈسکشن کے دوران اکمل کے تبصروں کو نامناسب سمجھا گیا۔ اس کی وجہ سے شدید ردعمل سامنے آیا۔ خاص طور پر سابق ہندوستانی اسپنر ہربھجن سنگھ نے انہیں ان کے تبصروں پر آڑے ہاتھوں لیا تھا۔
ہندوستان اور پاکستان کے درمیان میچ کے دوران ارشدیپ کے بارے میں اکمل کے تبصرے تنازعہ کا باعث بنے تھے۔ اکمل نے یہ تبصرہ اس وقت کیا تھا جب ارشدیپ میچ کے دوران آخری اوور کر رہے تھے۔ ہربھجن سنگھ نے انسٹاگرام پر اکمل کے تبصرے کی ویڈیو پوسٹ کی ہے جس میں وہ یہ کہتے ہوئے نظر آ رہے ہیں کہ کچھ بھی ہو سکتا ہے۔ 12 بج رہے ہیں۔ اس تبصرہ کو سکھ برادری کی تضحیک آمیز سمجھا گیا۔
اس ردعمل کے جواب میں اکمل نے سوشل میڈیا پلیٹ فارم ایکس پر معافی مانگ لی۔ اکمل نے ایکس پر ایک پوسٹ میں کہا کہ مجھے اپنے حالیہ تبصروں پر شدید افسوس ہے۔ میں ہربھجن سنگھ اور سکھ برادری سے معافی مانگتا ہوں۔ میرے الفاظ نامناسب اور توہین آمیز تھے۔ میں دنیا بھر کے سکھوں کا بہت احترام کرتا ہوں اور میرا کبھی کسی کو تکلیف پہنچانے کا ارادہ نہیں تھا۔
یہ بھی پڑھیں:عرفان پٹھان نے کچھ اس انداز میں ہندوستان کی جیت پر جشن منایا
اس سے قبل ہربھجن سنگھ نے اکمل کو ان کے تبصروں پر تنقید کا نشانہ بنایا تھا۔ ہربھجن نے ایکس پر اپنا غصہ ظاہر کیا تھا۔ انہوں نے لکھا کہ کامران اکمل اپنا منہ کھولنے سے پہلے سکھوں کی تاریخ جاننی چاہیے۔
