حیدرآباد: گذشتہ روز پنجاب سے ملی جیت پر خوشی کا اظہار کرتے ہوئے رائل چیلنجرز بنگلور کے کپتان فاف ڈو پلیسس نے کہا کہ یہ ہمارے لیے بہت بڑی فتح ہے۔ جب آپ جیت نہیں رہے ہیں تو یہ آپ کو ذہنی طور پر متاثر کرتا ہے، یہ آپ کے اعتماد کو متاثر کرتا ہے۔ میں آج رات اچھی طرح سو سکوں گا۔ صرف ایک چیز جو اعتماد دیتی ہے وہ کارکردگی ہے۔ مقابلے کے پہلے ہاف میں ہم نے محسوس کیا کہ ہم اپنی صلاحیت کے قریب کہیں نہیں تھے اور جب آپ 50 فیصد یا 60 فیصد پر کھیل رہے ہوتے ہیں تو آپ کو اعتماد نہیں ملتا۔ مقابلہ بہت سخت ہے، ٹیمیں بہت مضبوط ہیں لہذا اگر آپ 100 فیصد پر نہیں ہیں تو آپ کو مشکل وقت کا سامنا کرنا پڑے گا۔
انہوں نے کہاکہ پچھلے ڈیڑھ ہفتے سے ہم اپنے کھیل میں بہتر کارکردگی کو یقینی بنانے کے لیے سخت محنت کر رہے ہیں۔ آخری میچ میں ہماری بیٹنگ میں اعتماد نظر آیا۔ اب ہمارے لیے زیادہ لوگ رن بنا رہے ہیں۔ ٹورنامنٹ کے پہلے حصے میں وراٹ کے بلے سے ہی رن آ رہے تھے۔ رجت نے اب مسلسل دو اچھی اننگز کھیلی ہیں، گرین رن بنا رہا ہے اور یہ ان کے لیے بہت اچھا ہے۔ بیٹنگ لائن اپ کے طور پر مل کر حصہ ڈالنا ضروری ہے کیونکہ ہم نے دیکھا ہے کہ کتنے بڑے اسکور بنائے جا رہے ہیں اور صرف ایک شخص تمام رن نہیں بنا سکتا۔
انہوں نے کہا کہ ظاہر ہے کہ ہم جانتے ہیں کہ چناسوامی ہمارے لیے مایوس کن رہا ہے۔ سچ پوچھیں تو بولنگ کے لئے بہت مشکل میدان ہے۔ یہ اسپنروں کے لیے ایک چیلنج ہے۔ ہم کسی ایسی چیز کی تلاش میں ہیں جو ہمارے لیے اس گراؤنڈ پر بولنگ کرنا آسان بنا دے، لیکن ہمیں ایسا فارمولہ تلاش کرنا مشکل ہو رہا ہے جو کارگر ہو۔ مجھے لگتا ہے کہ اب ٹی -20 میں آپ کو اپنی ٹیم میں ایک لیگ اسپنر رکھنا ہی ہو گا۔
یہ بھی پڑھیں:بنگلورو نے حیدرآباد کے خلاف 35 رنز کی جیت کے ساتھ پلے آف کی امیدوں کو زندہ رکھا - RCB vs SRH
قابل ذکر ہے کہ آر سی بی نے جمعرات کی رات سن رائزرس حیدرآباد کو ان کے گھر پر 35 رن سے شکست دے کر آئی پی ایل 2024 میں مسلسل چھ میچ ہارنے کا سلسلہ ختم کر دیا ہے۔ رجت پاٹیدار نے صرف 20 گیندوں میں 50 رن کی اننگز کھیل کر آر سی بی کو سات وکٹوں پر 206 رن تک پہنچایا تھا اور جواب میں حیدرآباد کی ٹیم آٹھ وکٹ پر صرف 171 رن بنا سکی۔ کرن شرما اور سوپنل سنگھ نے شاندار اسپن بولنگ کا مظاہرہ کیا اور دو دو وکٹیں حاصل کی تھیں۔
یو این آئی
