حیدرآباد: پرتگال کے تجربہ کار فٹبالر کرسٹیانو رونالڈو نے 21 اگست کو اپنا یوٹیوب چینل "UR" لانچ کرتے ہی اپنا نام ریکارڈز بک میں درج کرا دیا۔ کیونکہ پہلے 90 منٹ میں ہی ان کے یوٹیوب چینل کو 10 لاکھ سبسکرائبرز مل گئے، جو کہ تیز ترین 10 لاکھ سبسکرائبرز جمع کرنے کا عالمی ریکارڈ ہے۔
اپنا یوٹیوب چینل کھولنے کے ایک دن سے بھی کم وقت میں فٹبالر کے چینل نے 15 ملین سبسکرائبرز کو عبور کر لیا ہے۔ رونالڈو نے اپنے سوشل میڈیا اکاؤنٹس پر اپنا یوٹیوب چینل شروع کرنے کا اعلان کیا۔ جہاں ان کی بڑی تعداد میں فالوورز ہیں۔ رونالڈو کے ایکس پر 112.6 ملین، فیسبک پر 170 ملین اور انسٹاگرام پر 636 ملین فالوورز ہیں۔
A present for my family ❤️ Thank you to all the SIUUUbscribers! ➡️ https://t.co/d6RaDnAgEW pic.twitter.com/keWtHU64d7
— Cristiano Ronaldo (@Cristiano) August 21, 2024
رونالڈو نے بدھ کو اپنے سوشل میڈیا اکاؤنٹس پر پوسٹ کیا،"انتظار ختم ہوا۔ میرا یوٹیوب چینل آخر کار یہاں ہے! SIUUU سبسکرائب کریں اور اس نئے سفر میں میرے ساتھ شامل ہوں،" رونالڈوکی پہلی ویڈیو کو اب تک 13 گھنٹوں کے اندر 7.95 ملین افراد دیکھ چکے ہیں۔ اپنی پہلی ویڈیو میں رونالڈو نے اپنے فٹبال کے شوق کا اظہار کیا اور میدان کے علاوہ اپنی زندگی کے بارے میں بھی معلومات شیئر کیں۔
The wait is over 👀🎬 My @YouTube channel is finally here! SIUUUbscribe and join me on this new journey: https://t.co/d6RaDnAgEW pic.twitter.com/Yl8TqTQ7C9
— Cristiano Ronaldo (@Cristiano) August 21, 2024
جس میں کرسٹیانو رونالڈو نے کہا کہ مجھے یہ پروجیکٹ حقیقت میں لانے پر بہت خوشی ہے، یہ کافی عرصے سے میرے ذہن میں تھا لیکن اب آخر کار ہمارے پاس اسے حقیقت میں تبدیل کرنے کا ایک سنہری موقع ہے۔ میں ہمیشہ سے سوشل میڈیا پر اپنے مداحوں کے ساتھ لطف اندوز ہوتا آیا ہوں اور میرا یوٹیوب چینل مجھے اس کے لیے ایک اور بڑا پلیٹ فارم فراہم کرے گا، جس میں لوگ میرے بارے میں مزید جانیں گے۔‘
صرف 5 گھنٹوں کے اندر ہی رونالڈو کے چینل نے 50 لاکھ سے زیادہ سبسکرائبرز حاصل کر لیے تھے اور 25 گھنٹے سے بھی کم وقت میں اس کی تعداد 14 ملین تک پہنچ گئی ہے۔ اسی حساب سے اگر یہ تعداد بڑھتی رہی تو رونالڈو کا ’UR‘ یوٹیوب چینل تاریخ کا سب سے تیزی سے بڑھنے والا چینل بن سکتا ہے جو فی الحال مسٹر بیسٹ کے پاس ہے، جن کے 311 ملین سبسکرائبرز ہیں۔
ریال میڈرڈ اور مانچسٹر یونائیٹڈ کے سابق کھلاڑی اس وقت سعودی عرب کے کلب النصر کے لیے کھیلتے ہیں اور دو دہائیوں سے زائد عرصے سے بین الاقوامی ٹورنامنٹس میں پرتگال کی نمائندگی کر چکے ہیں۔
