نئی دہلی: آئی سی سی نے ہائبرڈ ماڈل پر چیمپئنز ٹرافی کے انعقاد کی منظوری دے دی ہے۔ اس حوالے سے بی سی سی آئی اور پاکستان کرکٹ بورڈ کے درمیان ایک معاہدہ بھی طے پا گیا ہے۔ اب ہندوستانی ٹیم چیمپئنز ٹرافی میں اپنے میچ دبئی میں کھیلے گی۔
چیمپئنز ٹرافی کے حوالے سے بڑی خبر سامنے آئی ہے۔ انٹرنیشنل کرکٹ کونسل (آئی سی سی) نے چیمپئنز ٹرافی 2025 کے 'ہائبرڈ ماڈل' پر انعقاد کی منظوری دے دی ہے۔ اب یہ ٹورنامنٹ پاکستان اور دبئی (متحدہ عرب امارات) میں کھیلا جائے گا۔ اس حوالے سے بورڈ آف کنٹرول فار کرکٹ ان انڈیا اور پاکستان کرکٹ بورڈ کے درمیان ایک معاہدہ بھی طے پا گیا ہے۔ اب ہندوستانی ٹیم چیمپئنز ٹرافی میں اپنے میچ دبئی میں کھیلے گی۔
بی سی سی آئی اور پی سی بی دونوں نے اصولی طور پر اس بات پر اتفاق کیا ہے کہ پاکستان ٹی ٹوئنٹی ورلڈ کپ 2026 میں لیگ میچز کے لیے بھارت کا سفر نہیں کرے گا۔ پاکستان یہ میچ کولمبو میں کھیلے گا۔ ہائبرڈ ماڈل پر چیمپئنز ٹرافی کے انعقاد کی وجہ سے پی سی بی کو کوئی معاوضہ نہیں ملے گا۔ لیکن انہیں 2027 کے بعد کسی آئی سی سی ویمنز ٹورنامنٹ کی میزبانی مل جائے گی۔
