حیدرآباد: بنگلہ دیش میں سیاسی استحکام کا پندرہ سالہ دور سابق وزیر اعظم شیخ حسینہ کے غیر متوقع استعفیٰ کے ساتھ اچانک ختم ہو گیا۔ تاریخ اپنے آپ کو دہراتی نظر آتی ہے۔ تقریباً پانچ دہائیاں قبل 15 اگست 1975 کو آزاد بنگلہ دیش کے پہلے صدر شیخ مجیب الرحمان اور ان کے خاندان کو بنگلہ دیشی فوج کی قیادت میں بغاوت میں بے دردی سے قتل کر دیا گیا تھا۔ شیخ حسینہ کی حکومت کے خاتمے کے بعد، بنگلہ دیش ان جنوب ایشیائی ممالک کی صفوں میں شامل ہو گیا ہے جو پرتشدد تنازعات کے پس منظر میں سیاسی بحران کا سامنا کر رہے ہیں۔ ملک گیر احتجاج کیوں شروع ہوا۔ بنیادی طور پر طلباء کی قیادت میں مظاہرین اس پالیسی کی مخالفت کر رہے تھے جس میں 1971 کی جنگ آزادی میں حصہ لینے والوں کی اولاد کے لیے 30 فیصد سرکاری ملازمتیں مختص کی گئی تھیں۔
![Reasoning the Political Crisis in Bangladesh by Anshuman Behera of NIAS Bengaluru](https://etvbharatimages.akamaized.net/etvbharat/prod-images/14-08-2024/22203580_thu2.jpg)
اس عنصر نے اندر ہی اندر پک رہے لاوے کو اچھال دیا اور پورا ملک احتجاج کی لپیٹ میں آگیا۔ مزید برآں، بیرونی اثرات، جیسے امریکہ اور چین کے درمیان جغرافیائی و سیاسی مقابلہ آرائی اور بنیاد پرست عناصر کے لیے پاکستان کی جانب سے درپردہ حمایت، نے صورت حال کو مزید پیچیدہ بنا دیا ہے۔ طلباء کے مظاہرے اگرچہ احتجاج شروع ہونے کا بنیادی محرک بنے لیکن اس بات سے صرف نظر نہیں کیا جاسکتا کہ محدود جمہوریت کی فراہمی اور اسلامی بنیاد پرستوں کی بڑھتی سرگرمیوں نے انہیں اگلی سطح تک پہنچایا۔ چنانچہ یہ منظر نامہ گہری جانچ کا مستحق ہے۔
![Reasoning the Political Crisis in Bangladesh by Anshuman Behera of NIAS Bengaluru](https://etvbharatimages.akamaized.net/etvbharat/prod-images/14-08-2024/22203580_thu.jpg)
بنگلہ دیش میں جمہوریت کا تجربہ
بنگلہ دیش کا جمہوریت کے ساتھ تجربہ چیلنجوں اور محدود کامیابیوں سے بھرا ہوا ہے۔ ملک کے بنیادی نظریات جن میں قوم پرستی، جمہوریت، سوشلزم، اور سیکولر ازم، شامل ہے، کو مسلسل رکاوٹوں کا سامنا کرنا پڑا ہے۔ بنگلہ دیش میں جمہوریت کی محدود کامیابی دو باہم جڑے ہوئے عوامل سے منسوب کی جا سکتی ہے۔ سب سے پہلے، سیاسی حکومتیں، خاص طور پر عوامی لیگ کی قیادت میں، جمہوری اصولوں کو مکمل طور پر اپنانے سے گریزاں ہیں۔ 1975 میں شیخ مجیب الرحمٰن کا قتل اور 2024 میں شیخ حسینہ کی برطرفی، منتخب حکومتوں کے آمرانہ رجحانات کی عکاسی کرتے ہیں کیونکہ ان حکومتوں نے حزب مخالف کے لیے بہت کم جگہ چھوڑی جس کے نتیجے میں سیاسی ماحول نازک ہوا۔ بنگلہ دیش کی آزادی کے ابتدائی سالوں میں شیخ مجیب الرحمان کی حکومت اور شیخ حسینہ کی پندرہ سالہ حکومت کے درمیان نمایاں مماثلت ہے۔ دونوں ادوار میں یہ قدر مشترک ہے کہ حزب اختلاف کو کچلا گیا، بے تحاشہ بدعنوانی ہوئی اور خود مختار فیصلہ سازی کے تجربات کیے گئے۔
![Reasoning the Political Crisis in Bangladesh by Anshuman Behera of NIAS Bengaluru](https://etvbharatimages.akamaized.net/etvbharat/prod-images/14-08-2024/22203580_thu1.jpg)
کیا بنگلہ دیش میں جمہوریت پسپا ہو رہی ہے؟
شیخ حسینہ کا دوسرا دور، جنوری 2009 سے اگست 2024 تک، بنگلہ دیش کی سیاسی تاریخ میں خاصا اہم ہے۔ برسوں کی غیر یقینی صورتحال اور فوجی حمایت یافتہ نگراں حکومت کے بعد، شیخ حسینہ کی سربراہی میں گرینڈ الائنس نے دسمبر 2008 کے انتخابات میں بھاری اکثریت سے کامیابی حاصل کی اور 2009 میں اقتدار سنبھالا۔ 2008 میں عوامی لیگ کو ملنے والے بھاری مینڈیٹ نے امیدوں اور بنگلہ دیشی عوام کی خواہشات جب کہ حکومت نے غربت کے خاتمے، روزگار پیدا کرنے اور استحکام کو یقینی بنانے میں پیش رفت کی، وہ ایک جامع اور شراکتی سیاسی نظام بنانے میں ناکام رہی۔ یہ 2014، 2018 اور 2024 کے بعد کے عام انتخابات کے اپوزیشن کے بائیکاٹ میں واضح تھا۔ ناقدین کا کہنا تھا کہ بنگلہ دیش میں جمہوریت پسپائی اختیار کر رہی ہے۔
![Reasoning the Political Crisis in Bangladesh by Anshuman Behera of NIAS Bengaluru](https://etvbharatimages.akamaized.net/etvbharat/prod-images/14-08-2024/22203580_thu3.jpg)
ملک انتخابی عمل میں تشدد اور دھوکہ دہی سے متاثر ہوا ہے۔ مزید برآں، اقتصادی ترقی میں شیخ حسینہ کی شراکت کے بارے میں عوام کا تاثر کمزور ہونا شروع ہوا کیونکہ جمہوری اقدار کو برقرار رکھنے میں حکومت کی کارکردگی جیسے کہ نمائندگی، حقوق اور قانون کی حکمرانی میں کمی آئی۔ ایک مضبوط، جائز اور جمہوری اپوزیشن کی عدم موجودگی میں، جو کسی بھی جمہوریت میں حفاظتی جال کا کام کرتی ہے، عوامی لیگ کی حکومت نے طلباء کے منظم پرتشدد مظاہروں کے درمیان اقتدار پر اپنی گرفت برقرار رکھنے کے لیے جدوجہد کی، جسے حزب اختلاف، اسلام پسندوں، عام شہریوں، طلبہ اور سول سوسائٹی کی حمایت حاصل تھی۔
حسینہ حکومت نے اسلامی گروپوں پر پابندی لگانے کا کام کیا
جماعت اسلامی جیسے اسلامی گروہوں پر پابندی لگانے سمیت، ان قوتوں کو عارضی طور پر قابو کرنے میں حسینہ واجد کی حکومت کامیاب رہی۔ تاہم اس جماعت کے نظریات کی جڑیں بہت گہری ہیں اور سماجی بنیاد نے اسے دوبارہ مضبوط ہونے دیا حالانکہ حسینہ حکومت میں جماعت کے بہت سے رہنماؤں کو جنگی جرائم کے مقدمات میں پھانسی کی سزا دی گئی۔ حزبِ اختلاف کی مرکزی جماعت، بنگلہ دیش نیشنلسٹ پارٹی یا بی این پی کی حمایت یافتہ اسلام پسند پارٹی کی بحالی عوامی لیگ کی حکومت کے لیے اہم چیلنجز کا باعث بنی ہوئی ہے۔
پچھلے پندرہ سالوں کے دوران، بنگلہ دیش میں اسلام پسند گروپوں نے عوامی لیگ کو غیر قانونی اور غیر مستحکم کرنے کے لیے بار بار احتجاج منظم کیے۔ مثال کے طور پر 2009 کی پِلخانہ بغاوت، توہینِ مذہب کے قوانین کے مطالبے کے لیے حزبِ اسلامی نے مظاہرے کیے، 2016 کے دہشت گردانہ حملے کی ذمہ داری آئی ایس آئی ایس نے قبول کی، روہنگیا کے ساتھ اظہار یکجہتی کے لیے بڑے پیمانے پر مظاہرے ہوئے اور طلبہ کے احتجاج میں اسلامی گروپوں نے بڑھ چڑھ کر حصہ لیا۔ ان مظاہروں کے شرکا کی اصلیت کو نظر انداز نہیں کیا جا سکتا۔ یہ مظاہرے، جن کا زیادہ تر مقصد عوامی لیگ کی حکومت کے خلاف ہے، ہمیشہ اسلام نواز، جمہوریت مخالف، اور بھارت مخالف ہیں۔ حکومت کے شدید کریک ڈاؤن کے باوجود، اسلام پسند قوتوں نے دوبارہ منظم ہونا جاری رکھا ہے، جب کہ شیخ حسینہ کی حکومت کی جانب سے اسلامی جذبات کو مطمئن کرنے کی کوششیں اسلام پسندوں کے ہاتھ لگ گئیں۔
اقتدار میں رہنے والوں نے جمہوری اصولوں سے انحراف کیا
اپنی آزادی کے بعد سے، بنگلہ دیش نے ملک کے لیے بہترین طرز حکمرانی پر اتفاق رائے تک پہنچنے کے لیے جدوجہد کی ہے۔ اسلام ازم کے نظریات اکثر جمہوریت، قوم پرستی، سیکولرازم اور سوشل ازم کے اصولوں سے براہ راست ٹکراتے ہیں۔ اگرچہ اسلام پسندوں کا سیاسی اسلام کے قیام کا ہدف ابھی تک غیر حقیقی ہے، لیکن ان کی کوششیں بنگلہ دیش میں جمہوری عمل کی راہ میں نمایاں رکاوٹیں کھڑی کر رہی ہیں۔ ملک میں جمہوریت کی محدود ترقی کی ذمہ داری منتخب حکومتوں بالخصوص عوامی لیگ پر عائد ہوتی ہے۔ نتیجتاً، بنگلہ دیش میں جاری سیاسی بحران اسلام پسند قوتوں کی طرف سے جمہوریت کو مسترد کرنے اور اقتدار میں رہنے والوں کی طرف سے جمہوری اصولوں کے خاتمے سے پیدا ہوا ہے۔