وارانسی: منشی پریم چند اردو اور ہندی کے نمائندہ فکشن نگار تھے۔ دونوں زبانوں کے ادب میں ان کی خدمات مشترک ہیں لیکن بنیادی طور پر وہ اردو کے ہی کہانی کار ہیں۔ انہوں نے اپنی کہانیوں سے محروم و مظلوم طبقے میں نہ صرف بیداری پیدا کی بلکہ ذات پات اور امتیازی سلوک کے خاتمے میں کلیدی رول ادا کیا ہے۔ ان کا سماجی و تہذیبی مطالعہ بہت وسیع تھا۔ اپنے ادب میں انہوں نے اسے برتا اور سماجی و انسانی مسائل کی ترجمانی پوری دیانت داری کے ساتھ کی۔ ان خیالات کا اظہار شعبۂ اردو بنارس ہندو یونیورسٹی کے صدر پروفیسر آفتاب احمد آفاقی نے اپنے صدارتی خطبہ میں کیا۔
پریم چند کی یوم پیدائش کے موقع پر شعبۂ اردو کے زیر اہتمام منعقد طلباء سیمینار میں انہوں نے نئی نسل کو پریم چند کی تفہیم اور ان کے مشن کو آگے بڑھانے پر زور دیا۔ شعبہ کے استاد ڈاکٹر مشرف علی نے پریم چند کی فکر وفن پر تفصیل سے روشنی ڈالی۔ انہوں نے کہا کہ پریم چند کی شخصیت بہت تہ دار اور پہلودار ہے اور ہر پہلو سچائی وصداقت کی ترجمانی کرتا ہے۔ پریم چند کا عہد ہندوستان کے سیاسی وسماجی پس منظر میں بہت اہمیت رکھتا ہے، جسے سمجھے بغیر ان کے ادب کو نہیں سمجھا جاسکتا۔
