حیدرآباد: پروین شاکر 24 نومبر 1952ء کو کراچی میں پیدا ہوئی تھیں، انہوں نے ابتدائی اور اعلیٰ تعلیم کراچی سے ہی حاصل کی۔ 1968 میں انہوں نے جامعہ کراچی سے انگریزی میں ایم اے کیا جبکہ ہاورڈ امریکہ سے بینک اینڈ ایڈمنسٹریشن میں ایم اے کیا۔ عمر کی صرف 42 بہاریں دیکھنے والی اس خوبصورت شاعرہ نے اردو شاعری کو لازوال تحفے دیے ہیں، جسے اردو دنیا کبھی بھلا نہیں سکتی۔
تعلیم سے فراغت کے بعد وہ ملازمت سے جڑ گئیں اور مختلف اعلیٰ عہدوں پر فائز رہیں۔ انھوں نے خواتین کو یہ پیغام دیا کہ ایک ملازمت پیشہ عورت ایک ساتھ کئی کام کو انجام دے سکتی ہے، گھریلو ذمہ داری، ملازمت کے ساتھ ساتھ اپنے شوق کی تسکین بھی کر سکتی ہے۔
ابتداً وہ درس وتدریس سے وابستہ ہوکر انگریزی زبان وادب کی لیکچرر ہوئیں، اس کے بعد سول سروس میں آکر کسٹم کلکٹر کے عہدہ پر فائز ہوئیں۔ اگرچہ پروین شاکر انگریزی میں مہارت رکھتی تھیں لیکن انہیں اردو شعر وادب سے بے پناہ لگاؤ تھا یہی وجہ ہے کہ انہوں نے بچپن سے اردو شعر وشاعری شروع کردی تھی۔
پروین شاکر کی شاعری کا موضوع محبت اور عورت رہی ہے۔ پروین شاکر کا پہلا مجموعۂ کلام خوشبو 1977 میں شائع ہوا۔ آئیے آج کے شعر و ادب میں ان کی مشہور زمانہ غزل 'کو بہ کو پھیل گئی بات شناسائی کی' ملاحظہ فرمائیں...
- غزل
کو بہ کو پھیل گئی بات شناسائی کی
اس نے خوشبو کی طرح میری پذیرائی کی
کیسے کہہ دوں کہ مجھے چھوڑ دیا ہے اس نے
بات تو سچ ہے مگر بات ہے رسوائی کی
