کٹرہ (جموں و کشمیر): پیر کو جموں اور کشمیر کے ضلع ریاسی میں ویشنو دیوی کے نئے ٹریک پر مٹی کے تودے گرنے سے دو خواتین یاتریوں کی موت ہو گئی اور بہت سے لوگوں کے زخمی ہونے کی بھی خبرے موصول ہورہی ہیں۔
بتایا جاتا ہے کہ زمین کھسکنے سے لوہے سے بنے ہوئے ٹریک کے ڈھانچے کے ایک حصے کو بھی نقصان پہنچا جسکے ٹوٹنے سے وہاں پر موجود لوگ زخمی ہوئے۔ عہدیداروں نے بتایا کہ دو خواتین یاتری شدید طور پر زخمی ہوئیں اور بعد میں دم توڑ گئیں۔ جبکہ اس واقعہ میں کئی دیگر زائرین بھی زخمی ہوئے ہیں اور زخمیوں کو ویشنو دیوی نارائن اسپتال پہنچایا گیا ہے۔
ڈپٹی کمشنر ریاسی وشیش پال مہاجن نے نمائندوں کو بتایا کی ادھکواری سے ماتا بھون کے درمیان ویشنو دیوی کے نئے ٹریک پر لینڈ سلائیڈنگ ہوئی اور سلائیڈ کے دوران دو یاتریوں کی موت ہو گئی۔
دریں اثنا، لینڈ سلائیڈنگ کے فوری بعد ریسکیو آپریشن شروع کیا گیا اور ایک خاتون سمیت تین زخمی افراد کو اسپتال منتقل کر دیا گیا۔ حکام نے بتایا کہ کٹرا میں ویشنو دیوی ٹریک کا پنچی علاقہ خاص طور پر لینڈ سلائیڈ سے متاثر ہوا ہے۔ جاری امدادی کارروائیوں کا مقصد تمام زائرین کی حفاظت کو یقینی بنانا اور ٹریک سے ملبہ ہٹانا ہے۔
لینڈ سلائیڈنگ ویشنو دیوی بھون روٹ پر پنچی ہیلی پیڈ کے قریب ہوئی جس سے خدشہ ہے کہ عقیدت مند ملبے میں پھنسے ہو سکتے ہیں۔ ویشنو دیوی شرائن بورڈ راحت اور بچاؤ کی کارروائیاں کر رہا ہے۔ شری ویشنو دیوی شرائن بورڈ کے سی ای او نے بھی اس بات کی تصدیق کی کہ وہاں پر پتھراؤ اور لینڈ سلائیڈنگ ہوئی ہے۔ شرائن بورڈ کی ڈیزاسٹر مینجمنٹ ٹیم فوری طور پر موقع پر پہنچ گئی، اور متاثرہ افراد کو ریسکیو اور امداد فراہم کرنے کی کوششیں جاری ہیں۔
