سرینگر (جموں کشمیر) : رامو جی راؤ گروپ آف کمپنیز کے بانی چیئرمین رامو جی راؤ 8جون کو اس دار فانی سے کوچ کر گئے۔ 88سالہ راموجی راؤ کو خراج عقیدت پیش کرنے کی غرض سے جمعرات کو ای ٹی وی بھارت کے مرکزی دفتر واقع حیدر آباد کے ساتھ ساتھ ملک بھر میں قائم ای ٹی وی بھارت کے سبھی بیوروز میں بھی خصوصی تعزیتی مجالس کا اہتمام کیا گیا۔ جن میں ای ٹی وی بھارت سے جڑے سبھی ملازمین نے شرکت کی اور مرحوم چیئرمین آنجہانی رامو جی راؤ کو شاندار الفاظ میں خراج عقیدت پیش کیا۔
سرینگر میں واقع بیورو آفس میں بھی ایک خصوصی تعزیتی مجلس منعقد ہوئی جس میں یہاں موجود سبھی نمائندوں، کیمرا پرسنز اور ڈیسک پر کام کر رہے ہیں کنڈنٹ و ویڈیو ایڈیٹرز نے شرکت اور ہمہ جہت شخصیت کے مالک رامو جی راؤ کو خراج عقیدت پیش کرکے ان کے ملازم دوست رویے کا تذکرہ کیا۔ تعزیتی مجلس کے آغاز میں شردھان جلی کی طور پر دو منٹ کی خاموشی اختیار کی گئی اور پھر اس ’’وصیت نامہ‘‘ کو پڑھ کر سنایا گیا جو رامو جی راؤ نے اپنی وفات سے قبل اپنے ملازمین کے لیے تحریر کی تھی۔ اس کے بعد آنجہانی کی سوانح حیات پر مبنی19 منٹ کی ستایزی فلم بھی پیش کی گئی۔
اس موقع پر ملازمین نے اپنے اپنے خیالات پیش کرتے ہوئے کہا کہ رامو جی راؤ نہ صرف ایک کامیاب کاروباری کے طور پر اپنی پہچان بنانے میں کامیاب ہوئے بلکہ انہوں نے صحافتی میدان میں بھی اپنی گراں قدر خدمات انجام دیکر ایک تاریخ رقم کی ہے۔ آنجہانی راموجی راؤ ملازم اور غریب پروری کے لیے ہمیشہ مشہور رہے اور وہ اپنی کمپنیز سے وابستہ ہزاروں ملازمین کو ’’عملہ‘‘ نہیں بلکہ ’’اہل خانہ‘‘ تصور کرتے تھے۔ اپنے ملازمین کے تئیں ان کا جزبہ اور خلوص ان کی وصیت میں بھی واضح طور جھلکتا ہے۔
