شوپیاں: آئی جی سی آرپی ایف گانیندر ورما نے ڈی آئی جی اوستھی کے ہمراہ پاد پاون شوپیاں کا دورہ کیا، جہاں پر کل شام مشتبہ عسکریت پسندوں نے غیر مقامی ڈرائیور پر فائرنگ کی تھی۔معلوم ہوا ہے کہ شوپیاں میں دوسرے روز بھی حملہ آوروں کی تلاش جاری رہی۔
یاد رہے کہ گزشتہ روز شوپیاں کے پادپاون علاقے میں دل رنجیت سنگھ نامی غیر مقامی ٹورسٹ گائیڈ پر نامعلوم عسکریت پسندوں نے حملہ کر کے زخمی کیا تھا۔ مذکوہ شخص اتراکھنڈ کا رہنے والا ہے۔ بتایا جارہا ہے کہ مذکوہ غیر مقامی ٹورسٹ گائیڈ جرمنی سے آئے ہوئے دو سیاحوں کو وادی کشمیر سیر و تفریح کیلئے لایا تھا۔
اطلاعات کے مطابق آئی جی سی آر پی ایف گانیندر ورما نے منگل کے روز پادپاون شوپیاں کا دورہ کیا۔ذرائع نے بتایا کہ آئی جی نے جائے وقوع کا بھی معائنہ کیا اور وہاں پر موجود عین شاہدین سے بھی گفت وشنید کی ۔انہوں نے کہا کہ آئی جی سی آر پی ایف نے آفیسران کو ہدایت دی کہ حملہ آوروں کی جلد از جلد شناخت کا کام مکمل کرکے انہیں کیفر کردار تک پہنچایا جائے۔
ذرائع نے مزید بتایا کہ جائے وقوع کا معائنہ کرنے کے بعد آئی جی سی آر پی ایف نے ڈی آئی جی اوستھی کے ہمراہ شوپیاں میں سکیورٹی صورتحال کا ایک اعلیٰ سطحی میٹنگ کے دوران جائزہ لیا۔میٹنگ کے دوران آئی جی سی آر پی ایف کو جنوبی ضلع شوپیاں کی سکیورٹی صورتحال کے بارے میں بریف کیا گیا ۔
مزید پڑھیں: شوپیاں میں غیر ریاستی ٹورسٹ گائیڈ پر مسلح افراد کا حملہ
باوثوق ذرائع کے مطابق آئی جی سی آر پی ایف نے جنوبی کشمیر میں سکیورٹی گرڈ اور ہیومن انٹیلی جنس کو مزید مضبوط کرنے پر زور دیا۔بتادیں کہ پیر کی شام پاد پاون شوپیاں میں مشتبہ ملی ٹینٹوں نے غیر مقامی ڈرائیور پر فائرنگ کی جس کے نتیجے میں وہ شدید طورپر زخمی ہوا اور بعد ازاں اسے علاج ومعالجہ کی خاطر سری نگر ریفر کیا گیاجہاں پر اس کی حالت مستحکم بتائی جارہی ہے
