پلوامہ(جموں و کشمیر): جنوبی کشمیر کے ضلع پلوامہ میں جمعرات کی سہ پہر سکیورٹی فورسز نے باڈی باغ پاہو کے نزدیک ایک مشتبہ آئی ای ڈی ناکارہ بنایا ہے۔
اطلاعات کے مطابق جمعرات کی سہ پہر سکیورٹی فورسز نے معمول کی چیکنگ کے دوران پاہو کے نزدیک ایک مشتبہ بارودی شئے برآمد کی، جس کے بعد شاہراہ پر ٹریفک کی نقل وحمل کو روک کر بم ڈسپوزل اسکارڈ کو جائے وقوع پر طلب کیا گیا۔
معلوم ہوا ہے کہ بم ڈسپوزل اسکارڈ نے بعد ازاں مشتبہ بارودی مواد کو ناکارہ بناکر ایک بہت بڑے حادثے کو رونما ہونے سے پہلے ہی ٹال دیا۔ذرائع نے بتایا کہ یوم جمہوریہ سے ایک دن قبل پلوامہ میں مشتبہ آئی ای ڈی برآمد ہونے کے بعد ضلع بھر میں سکیورٹی فورسز کو الرٹ پر رہنے کی ہدایت دی گئی ہے۔دریں اثنا پولیس نے اس سلسلے میں کیس درج کرکے مزید تحقیقات شروع کی ہے۔
مزید پڑھیں: جموں وکشمیر میں یوم جمہوریہ کی تقریبات کیلئے سکیورٹی کے فقیدالمثال انتظامات
بتادیں کہ یوم جمہوریہ کے پیش نظر وادی کشمیر میں سکیورٹی کے غیر معمولی انتظامات کئے گئے ہیں۔یوم جمہوریہ کی تقریبات کے پرامن انعقاد کو یقینی بنانے کے لئے وادی کے اطراف واکناف بالخصوص مختلف اضلاع کو گرمائی دارالحکومت کے ساتھ جوڑنے والی سڑکوں پر سکیورٹی فورسز اور ریاستی پولیس کے خصوصی ناکے بٹھائے گئے ہیں، جہاں چھوٹی بڑی گاڑیوں کو روک کر ان کی تلاشی لی جاتی ہے اور ان میں سوار مسافروں کی جامہ تلاشی لینے کے علاوہ شناختی کارڈ چیک کئے جاتے ہیں۔
