جموں: جموں و کشمیر کے ضلع رامبن کے برنوٹ علاقے میں اراضی دھنسنے کا واقعہ پیش آنے کے بعد ضلع انتظامیہ نے متاثرہ کنبوں کی مدد کے لیے دن رات چلنے والا آپریشنل کچن قائم کیا ہے۔ ضلع مجسٹریٹ رام بن بصیر الحق نے کہا کہ 'رامبن ضلع انتطامیہ کی طرف سے کوششیں جا رہی ہیں، پرنوٹ میں کیمپ کی جگہ پر متاثرہ کنبوں کی مدد کے لئے دن رات چلنے والا آپریشنل کچن قائم کیا گیا ہے۔انہوں نے کہا کہ بچاؤ کارروائیوں اور باز آبادکاری کی کوششوں کو مزید تیز کر دیا گیا ہے۔
ضلع مجسٹریٹ نے کہا کہ بے گھر کنبوں کو در پیش مسائل کے فوری حل کے لئے ایک ایمرجنسی آپریشن سینٹر بھی قائم کیا گیا ہے۔انہوں نے کہا کہ پرنوٹ میں زمین دھنسنے اور رہائشی مکانوں کو نقصان پہنچنے سے پیدا شدہ صورتحال سے فوری طور نمٹا جا رہا ہے۔ان کا کہنا ہے کہ متاثرین کو موثر امداد فراہم کرنے کی کوششوں کو یقینی بنایا جا رہا ہے۔
مزید پڑھیں: رام بن، سڑک دھنس جانے سے 50 مکانات تباہ، درجنوں کنبے بے گھر
ادھر ضلع مجسٹریٹ بصیرالحق نے پرنوٹ، جو ضلع صدر مقام سے پانچ کلو میٹر دوری پر واقع ہے، کا دورہ کرکے متاثرین کو بھر پور مدد کی یقین دہانی کی۔حکام کا کہنا ہے کہ گول سب ڈویژن کو ضلع ہیڈکوارٹر کے ساتھ جوڑنے کے لئے متبادل سڑک کو تیار کیا گیا ہے۔
قابل ذکر ہے کہ فروری 2023 میں سنگلدان کے دکسر دالوا گاؤں میں زمین دھنس جانے سے کم سے کم 16 رہائشی مکانوں کو نقصان پہنچا تھا اور رامبن اور گول کے درمیان رابطہ منقطع ہوا تھا۔واضح رہے کہ جموں وکشمیر کے رامبن ضلع کے پرنوٹ علاقے میں درمیانی شب اراضی دھنس جانے سے 40 سے 50 رہائشی مکانوں کو نقصان پہنچا جبکہ 20مکان پوری طرح سے زمین بوس ہو گئے۔
(یو این آئی)
