نئی دہلی: نیشنل کانفرنس کے رکن پارلیمنٹ روح اللہ مہدی نے پیر کو جموں و کشمیر میں جلد از جلد انتخابات کرانے کا مطالبہ اٹھایا۔ سپریم کورٹ نے الیکشن کمیشن کو جموں و کشمیر میں 30 ستمبر تک انتخابات کرانے کی ہدایت دی تھی۔ پولنگ پینل نے ابھی تک انتخابات کے شیڈول کا اعلان نہیں کیا ہے۔
لوک سبھا میں مرکزی بجٹ پر بحث میں حصہ لیتے ہوئے روح اللہ مہدی نے کہا کہ صرف ایک مہینہ باقی ہے اور انتخابات کے انعقاد کے لیے کوئی عمل شروع نہیں کیا گیا ہے۔
سری نگر کے رکن پارلیمنٹ نے کہا کہ میں یہاں الیکشن کی بھیک مانگنے نہیں آیا ہوں، سپریم کورٹ نے اس حکومت کو ہدایت دی تھی کہ ستمبر تک جمہوری حکومت تشکیل دی جائے بس ایک مہینہ باقی ہے اور ابھی تک انتخابات کا کوئی عمل شروع نہیں ہوا ہے۔
انہوں نے مزید کہا کہ، "میں آپ سے درخواست کرتا ہوں کہ جمہوریت کی روح کے لیے انہیں ہدایت دیں کہ سپریم کورٹ کے حکم پر عمل کیا جائے اور انتخابات کرائے جائیں۔"
گزشتہ دسمبر میں، سابقہ ریاست جموں و کشمیر کو خصوصی درجہ دینے والی آرٹیکل 370 کی دفعات کو منسوخ کرنے کے مرکز کے فیصلے کو سپریم کورٹ نے برقرار رکھتے ہوئے جلد از جلد ریاست کی بحالی کی ہدایت دی تھی۔ سپریم کورٹ کے حکم میں کہا گیا تھا کہ اسمبلی انتخابات 30 ستمبر 2024 تک کرائے جائیں۔
مارچ میں لوک سبھا انتخابات کے شیڈول کا اعلان کرتے ہوئے الیکشن کمیشن نے کہا تھا کہ جموں و کشمیر میں اسمبلی اور پارلیمانی انتخابات کا ایک ساتھ انعقاد لاجسٹک اور سیکورٹی وجوہات کی وجہ سے کرانا ممکن نہیں تھا۔
جب بھی جموں و کشمیر میں اسمبلی انتخابات ہوں گے، یہ اگست 2019 میں آئین کی دفعہ 370 کی منسوخی اور جموں و کشمیر کو دو مرکز کے زیر انتظام علاقوں میں تقسیم کرنے کے بعد پہلی مرتبہ ہوں گے۔
یہ بھی پڑھیں:
