سری نگر کے پارلیمانی انتخابات 2024 کے لیے نامزدگی کا اعلان - Srinagar Lok Sabha Constituency

Nomination Notified for Srinagar Constituency: سرینگر پارلیمانی نشست کے لیے نامزدگی کے لیے نوٹیفیکشن جاری کر دیا گیا ہے۔ اس حلقہ سے آغا روح اللہ اور وحید پرہ آمنے سامنے ہیں۔ یہاں دونوں کے درمیان مقابلہ کافی دلچسپ ہوگیا ہے۔ وحید پرہ پیپلز ڈیمو کریٹک پارٹی سے امیدوار ہیں جب کہ نیشنل کانفرنس سے آغا روح اللہ ہیں۔

سرینگر: الیکشن کمیشن آف انڈیا نے سرینگر پارلیمانی نشست کے لیے امیدواروں کے لیے کاغذات نامزدگی داخل کرنے کے لیے آج نوٹیفیکشن کا اجرا کیا ہے۔ سرینگر پارلیمانی حلقہ میں 13 مئی کو عام انتخابات منعقد ہونے جارہے ہیں جس کے لیے سیاسی جماعتیں کافی سرگرم ہوگئی ہیں۔

سری نگر کے پارلیمانی انتخابات 2024 کے لیے نامزدگی کا اعلان

سرینگر حلقہ کے لیے کمیشن کی جانب سے ریٹرننگ افسر نے آج نوٹیفکیشن جاری کرتے ہوئے کہا کہ امیدوار 25 اپریل تک کاغذات نامزدگی داخل کر سکتے ہیں جس کے لیے اوقات کار صبح 11 بجے سے تین بجے ہوگا۔ اور یہ سرینگر کے ڈپٹی کمشنر کے دفتر سے حاصل کیے جاسکتے ہیں۔ ریٹرننگ افسر نے بتایا کہ امیدواروں کے کاغذات نامزدگی کی جانچ پڑتال 26 اپریل کو صبح 10:30 بجے سے عمل میں لائی جائے گی۔ امیدواروں کے کاغذات نامزدگی واپس لینے کے لیے 29 اپریل طے کیا گیا ہے۔ جس کے لیے وہ تحریری طور ریٹرننگ افسر کو مطلع کرسکتا ہے۔واضح رہے کہ سرینگر پارلیمانی حلقہ میں 13 مئی کو انتخابات منعقد ہونے جارہے ہیں۔ اس حلقہ میں پی ڈی پی کے امیدوار وحید پرہ، نیشنل کانفرنس کے آغا روح اللہ اور اپنی پارٹی کے اشرف میر کے مابین مقابلہ ہوگا۔ بی جے پی نے اس نشست پر اب تک کوئی امیدوار نامزد نہیں کیا ہے۔