سری نگر: جموں و کشمیر کے سابق وزیراعلیٰ عمر عبداللہ نے سری نگر میں میڈیا کے نمائندوں کو بتایا کہ یہ اچھی بات ہے کہ سپریم کورٹ نے اتر پردیش میں کانوڑ یاترا کے احکامات پر روک لگا دی ہے۔ ایسے احکامات جاری نہیں کیے جانے چاہیے تھے۔ ہم سپریم کورٹ کے فیصلے کا خیرمقدم کرتے ہیں۔
نیشنل کانفرنس کے نائب صدر عمر عبداللہ نے کہا کہ اگر مسلمانوں کو کانوڑ یاترا سے دور رکھنے کے لیے یہ حکم دیا گیا تھا تو خدا کے واسطے مجھے بتائیں کہ وادی کشمیر میں جو یاترا (امرناتھ) ہو رہی ہے کیا وہ مسلمانوں کے بغیر ممکن ہے؟
انہوں نے کہا کہ امرناتھ کے لئے جانے والے یاتری مسلمانوں کے کندھے پر سوار ہو کر یاترا کر رہے ہیں۔ ماتا ویشنو دیوی کی یاترا کے دوران جو یاتری گھوڑوں پر سوار ہوتے ہیں یا پتھس' (پورٹر) پر، وہ گھوڑے کس مذہب کے لوگوں کے ہوتے ہیں؟ وہ (بی جے پی) وہاں مذہب کو نہیں دیکھتے۔ کیا بی جے پی کے پاس ان سب سوالوں کا جواب ہے؟
یہ بھی پڑھیں: عمرعبداللہ نے جموں وکشمیر انتظامیہ کے لیے وزرات داخلہ کے نئے قواعد پر تنقید کی
آر ایس ایس کی سرگرمیوں میں حصہ لینے والے سرکاری ملازمین پر پابندی کو منسوخ کرنے کے مرکز کے فیصلے پر ایک سوال کے جواب میں نیشنل کانفرنس کے رہنما نے کہا کہ اگر انہیں یہ کرنا ہے تو سیاسی جماعتوں کی سرگرمیوں میں حصہ لینے والے ملازمین پر پابندی کو بھی ہٹا دیا جانا چاہیے کیونکہ "آر ایس ایس ایک سیاسی تنظیم ہے۔
