پلوامہ (جموں کشمیر) : بس اسٹینڈ پلوامہ میں پیر اور منگل کی درمیانی شب آتشزدگی کی ایک واردات میں موبائل دوکان خاکستر ہوگئی۔ گرچہ محکمہ فائر اینڈ ایمرجنسی سروسز کی بروقت کارروائی نے آگ کو مزید پھیلنے سے روک دیا۔ تاہم آگ کے سبب دکان میں موجود لاکھوں روپے مالیت کا سامان خاکستر ہو گیا۔ آگ کے سبب کسی جانی نقصان کی کوئی اطلاع نہیں ہے۔
آگ کے حوالہ سے موبال دکان کے مالک مرتضیٰ رحمان نے بتایا کہ نماز فجر کے موقع پر ہی انہیں دکان میں آتشزدگی کی اطلاع موصول ہوئی، جس کے بعد وہ فوری طور پر وہاں پہنچے۔ مرتضیٰ کے مطابق آگ کے سبب دکان میں موجود لاکھوں روپے مالیت کا سامان بشمول موبائل فون، مشینری، موبائل ایکسسریز اور دیگر سامان راکھ کے ڈھیر میں تبدیل ہو گیا۔
متاثرہ نے بتایا کہ فایر اینڈ ایمرجنسی سروسز، پلوامہ، کی فوری کارروائی نے آگ کو مزید پھیلنے سے روک دیا، تاہم آگ نے نہ صرف ان کی برسوں کی محنت کو خاک میں ملایا بلکہ انہیں مقروض بھی بنا دیا ہے۔ مرتضیٰ کے مطابق یہ دکان دو کنبوں کی آمدنی کا واحد ذریعہ تھا اور انہوں نے ایک اور شخص کے ساتھ شراکت پر دکان شروع کی تھی۔
مزید پڑھیں: سڑک حادثہ میں تین فائر ٹینڈرز زخمی
آگ لگنے کی وجوہات کے حوالہ سے انہوں نے کہا:ـ ’’ابھی تک یہ معلوم نہیں ہو سکا کہ آگ کیسے نمودار ہوئی تاہم غالب گمان ہے کہ آگ شارٹ سرکٹ کی وجہ سے لگی ہے۔‘‘ ادھر، اس ضمن میں پلوامہ پولیس نے ایک ایف آئی آر درج کرکے آگ لگنے کی وجہ جاننے کے لیے تحقیقات شروع کر دی ہے۔
