پلوامہ: ایم ایل اے راجپورہ غلام محیدالدین میر نے آج ضلع کے تمام ضلعی اور سیکٹری سطح کے افسران کے میٹنگ کی صدارت کی، تاکہ حکمت عملی پر تبادلہ خیال کیا جائے اور لوگوں کی شکایات کا ازالہ کیا جا سکے، مزید راجپورہ حلقے میں ترقیاتی منصوبوں کی رفتار کو تیز کیا جاسکے۔
غور طلب ہے کہ نومنتخب ایم ایل اے راجپورہ کی صدارت میں منعقدہ میٹنگ میں اسسٹنٹ کمشنر ریونیو پلوامہ، اسسٹنٹ کمشنر ڈیولپمنٹ پلوامہ، چیف پلاننگ آفیسر پلوامہ اور ضلع کے تمام ضلعی اور سیکٹری سطح کے افسران موجود تھے۔
واضح رہے کہ اجلاس کا بنیادی مقصد حلقہ میں جاری ترقیاتی منصوبوں کا جائزہ لینا اور عوام کی شکایات اور ان کے فوری ازالے کے مطالبات پر تبادلہ خیال کرنا تھا۔
ایم ایل اے راجپورہ غلام محیدالدین میر نے کہا کہ عمر عبد اللہ کی قیادت والی حکومت عوام کے مسائل اور شکایات کو دور کرنے اور جموں و کشمیر کی مجموعی ترقی کے لیے کام کرنے کے لیے ہر ممکن کوشش کر رہی ہے۔
ایم ایل اے راجپورہ غلام محیدالدین میر نے کہا کہ ان کی خصوصی توجہ ضلع پلوامہ کو سیاحت کے نقشے پر لانے پر مرکوز ہے تاکہ ضلع کی معیشت کو فروغ دیا جاسکے۔
