ترال: جموں و کشمیر میں ترال کے واگڈ میں گولی چلنے کی غیرمصدقہ اطلاع کے بعد فوج، پولیس اور سی آر پی ایف کی جانب سے علاقہ میں بڑے پیمانہ پر سرچ آپریشن شروع کیا گیا۔ تفصیلات کے مطابق واگڈ میں گولی چلنے کی آواز سنائی دینے کی اطلاع کے فوری بعد سیکوریٹی فورسس نے چوکسی اختیار کرلی اور علاقہ میں بڑے پیمانہ پر سرچ آپریشن شروع کردیا۔ واگڈ علاقہ میں تقریباً دوپہر ایک بجے گولی چلنے کی آواز سنائی دی جس کے بعد سیکورٹی فورسز نے پورے علاقے کا محاصرہ کرکے سرچ آپریشن شروع کردیا، عسکریت پسندوں کے چھپے رہنے کی غیرمصدقہ اطلاع کے بعد شروع کئے گئے سرچ آپریشن کی اعلی سیکورٹی افسران نگرانی کررہے ہیں۔ پولیس کی جانب سے ابھی تک اس سلسلہ میں کوئی بیان جاری نہیں کیا گیا۔ وہیں ایک اور اطلاع کے مطابق ڈرون کیمروں سے بھی علاقہ میں نگرانی کی جارہی ہے۔
آخری اطلاعات ملنے تک علاقے میں سرچ آپریشن جاری ہے اور ایسا مانا جا رہا ہے کہ آپریشن کو رات کے دوران موخر کیا جائے گا جبکہ ڈرون کیمروں کا استعمال کرنے کے علاوہ فوج کے ماہر کتوں کی خدمات بھی حاصل کی گئی ہے۔ پورے جنگلاتی علاقہ میں فوج کی بھاری نفری کو تعینات کیا گیا ہے۔ اس دوران واگڈ کے دیگر علاقوں میں بھی ٹریفک کی نقل و حمل کو یقینی بنانے کے حوالے سے اقدامات کیے گئے اور ٹریفک معمول کے مطابق جاری رہا۔
