سرینگر، جموں و کشمیر: سرینگر کے ڈل گیٹ علاقہ میں منگل کی شام کو ایک شخص کو تیز دھار ہتھیار سے حملہ کرنے کے بعد ہلاک کر دیا گیا۔ قتل کے الزام میں ملزم کو گرفتار کر لیا گیا ہے۔ پولیس حکام نے بتایا کہ بلال احمد گرو ولد نذیر احمد گرو اور بمنہ سرینگر کا رہائشی دیر شام کے حملہ میں شدید زخمی ہوا۔ اسے اسپتال لے جایا گیا، جہاں وہ زخموں کی تاب نہ لاتے ہوئے چل بسا۔ ملزم کی شناخت ہلال احمد شیرا ولد ریاض شیرا کے نام سے ہوئی ہے جو ٹینگ پورہ کا رہائشی ہے۔ پولیس نے شیرا کو گرفتار کر کے تفتیش شروع کر دی ہے۔
یہ بھی پڑھیں:
کشمیر میں چاقو زنی کے واقعات میں گذشتہ 10 ماہ کے دوران تین افراد کی موت
جموں و کشمیر پولیس کی جانب سے ایکس پر ایک پوسٹ میں، جسے پہلے ٹویٹر کے نام سے جانا جاتا تھا، میں کہا گیا کہ دو پھل فروشوں کے درمیان ہاتھا پائی کی وجہ سے یہ جان لیوا چھرا گھونپا گیا۔ "ڈل گیٹ کے علاقہ میں دو پھل فروشوں کے درمیان ہاتھا پائی ہوئی، جس میں ہلال احمد شیرا ولد ریاض شیرا اور ٹینگ پورہ کے رہائشی نے بمنہ کے رہائشی بلال احمد گرو کو چاقو مار کر ہلاک کر دیا۔ ایف آئی آر نمبر 70/2024 کے تحت۔ پی ایس آر ایم باغ میں آئی پی سی کی دفعہ 302 درج کی گئی ہے، اور ملزم کو گرفتار کر لیا گیا ہے، اور جرم میں استعمال ہونے والا ہتھیار برآمد کر لیا گیا ہے۔"
واضح رہے کہ کشمیر کی وادی میں گزشتہ چند سالوں کے درمیان ایسے جرائم دیکھنے کو مل رہے ہیں جن کا تصور بھی نہیں کیا گیا تھا۔ اعداد و شمار سے پتہ چلتا ہے کہ چاقو زنی کے واقعات میں اضافہ ہوتا جارہا ہے۔ چاقو زنی کا نیا رجحان تشویشناک حد تک بڑھ گیا ہے۔
