شوپیاں (جموں کشمیر) : بھارتیہ جنتا پارٹی (بی جے پی) کے جنرل سیکریٹری سنیل شرما نے پاکستان اور عسکریت پسندوں کی سخت مذمت کرتے ہوئے کہا: ’’پاکستان اور عسکریت پسند بوکھلاہٹ کے شکار ہو گئے ہیں اسی وجہ سے بھارتیہ جنتا پارٹی کے کارکنان پر حملہ کر رہے ہیں۔‘‘ سنیل شرما نے ان باتوں کا اظہار جنوبی کشمیر کے شوپیاں ضلع میں میڈیا نمائندوں کے ساتھ گفتگو کے دوران کیا۔
قبل ازیں، سنیل شرما نے ہیرپوہ، شوپیاں کا دورہ کرکے ہفتہ کے روز قتل کیے گئے سابق سرپنچ اور بی جے پی کارکن اعجاز احمد شیخ کے گھر جاکر لواحقین کے ساتھ تعزیت کا اظہار کیا ۔ انہوں نے یقین دلایا کہ ’’بی جے پی مقتول کارکن کے خاندان کی ہمیشہ مدد کرے گی اور حکومت ان کے لواحقین کو ایکس گریشیا امداد اور سرکاری ملازمت فراہم کرے گی۔‘‘ انہوں نے اعجاز احمد کے قتل کو ’’پوری انسانیت کا قتل‘‘ قرار دیتے ہوئے دعویٰ کیا کہ ’’سابق سرپنچ کے قتل نے پورے ہندوستان میں بی جے پی کارکنان کو مغموم کر دیا ہے، اور سانحے سے ان میں کافی غصہ بھی ہے۔‘‘
میڈیا سے بات کرتے ہوئے سنیل شرما نے کہا کہ ’’یہ حملہ صرف دہشت گردوں کی مایوسی کو ظاہر کرتا ہے، کیونکہ لوک سبھا انتخابات میں ووٹنگ کا ٹرن آؤٹ بہت زیادہ تھا اور شوپیاں کے لوگوں نے دہشت گردی کو مسترد کر کے بھارتی جمہوری نظام میں اپنا یقین ظاہر کیا ہے۔‘‘ انہوں نے مزید کہا کہ ’’بی جے پی، مرحوم کے خاندان کو ہر ممکن مدد فراہم کرے گی۔‘‘
یہ بھی پڑھیں: بی جے پی کارکنان کو سکیورٹی فراہم کرنے کا مطالبہ - Shopian BJP workers Protest
