موسمی صورت حال کے پیش نظر سرمائی تعطیلات کا جائزہ لیا جائے گا: ناظم تعلیم کشمیر

محکمہ موسمیات نے کشمیر میں مارچ کے پہلے ہفتے میں برفباری کی پیش گوئی کی ہے۔ اس کے پیش نظر اسکول ایجوکیشن محکمے نے اسکولوں میں سرمائی تعطیلات میں توسیع کے امکانات کا جائزہ لینے کی بات کہی ہے۔

سرینگر: کشمیر میں یکم مارچ سے دوبارہ برفباری کی پیش گوئی کے بیچ ڈائریکٹر اسکول ایجوکیشن نے کہا کہ موسمی صورت حال کے پیش نظر اسکولوں میں سرمائی تعطیلات میں توسیع کے امکانات کا جائزہ لیا جائے گا۔ ڈائریکٹر آف اسکول ایجوکیشن ڈاکٹر تصدق حسین میر نے کہا کہ محکمہ موسمیات کی پیش گوئی کے مطابق اگر کشمیر بھاری برف باری ہوئی اور ایسا لگا کہ بچے اسکول نہیں جا پائیں گے تو اس صورت میں تعطیل پر غور کیا جا سکتا ہے۔ بھاری برف باری ہونے کی پیش نظر تعطیلات میں توسیع کی جا سکتی ہے۔

واضح رہے کہ گذشتہ برس دسمبر میں کشمر صوبے کے اسکولوں میں سرمائی تعطیلات کا اعلان کیا گیا تھا جو کہ اب 29 فروری 2024 کو ختم ہو رہی ہیں۔ ایسے میں تین ماہ کی سرمائی تعطیلات کے بعد سرمائی زون کے تحت آنے والے اسکول یکم مارچ 2024 کو دوبارہ کھلنے جارہے ہیں۔ قابل ذکر ہے کہ محکمہ موسمیات نے وادی کشمیر میں مارچ کے پہلے ہفتے کے دوران بھاری برف باری کے ایک اور مرحلے کی پیش گوئی کی ہے۔ 26 فروری تک موسم خشک رہنے کا امکان ہے۔ اس بعد ایک کمزور مغربی ہوا کا دباؤ داخل ہونے کے نیتجے میں کشمیر میں ہلکی سے درمیانہ درجے کی برفباری ہو سکتی ہے۔