سرینگر: جموں وکشمیر کے سابق وزیر اعلیٰ اور ڈیموکریٹک پروگریسیو آزاد پارٹی کے چیئرمین غلام نبی آزاد نے کہا کہ جماعت اسلامی کی جانب سے انتخابات لڑنے سے متعلق دیا گیا حالیہ بیان خوش آئند ہے۔ کیونکہ مین اسٹریم سیاست میں آکر اگر کوئی قوم و ملک کی خدمت کرنا چاہتا ہے تو ہر کسی کو اس کا خیر مقدم کرنا چاہیے۔ انہوں نے کہا کہ جموں وکشمیر میں ووٹنگ کی شرح میں اضافہ کی جو توقعات تھی وہ دیکھنے کو نہیں ملی۔ ہاں چند فیصد کا اضافہ تو ہوا۔ لیکن یہ ہر الیکشن میں دیکھنے کو ملتا ہے۔ ان باتوں کا اظہار غلام نبی آزاد نے ای ٹی وی بھارت کے نمائندے پرویز الدین کے ساتھ ایک خاص گفتگو کے دوران کیا۔
یہ بھی پڑھیں:
انہوں نے کہا کہ جموں وکشمیر کی تین پارلیمانی نشستوں پر جو ووٹنگ کی شرح ریکارڈ کی گئی۔ وہ 2014 یا 2019 کے مقابلے میں بہتر تو ہے لیکن اس مرتبہ جو ووٹنگ کی شرح کو لے کر توقعات تھیں اس اعتبار سے تین نشستوں خاص کر سرینگر پارلیمانی سیٹ پر نہیں ہوئی۔ پوچھے گئے ایک سوال کے جواب میں انہوں نے کہا کہ جو سیاسی جماعتوں کے رہنما کہتے ہیں کہ یہ لوگ کی ناراضگی ہے جس طرح سرینگر میں رائے دہنگان اپنا ووٹ ڈالنے کے لیے باہر آئے تو اس اعتبار سے سرینگر کی ووٹنگ شرح کہیں زیادہ درج ہونی چاہیے تھی جو نہیں ہوئی۔ اور اگر واقعی لوگوں کو غصہ ہوتا تو 80 سے 90 فیصد ووٹنگ شرح سرینگر پارلیمانی حلقہ میں ریکارڈ کی جاتی۔
انہوں نے کہا کہ کسی بھی ریاست کے لیے اسمبلی انتخابات اہم ہوتے ہیں کیونکہ اس سے مقامی سرکار وجود میں آکر ریاست کے تعمیر و ترقی کے کام ہوتے ہیں۔ جس کا فائدہ وہاں کے لوگوں کو براہ راست ملتا ہے۔ ایسے میں جموں وکشمیر کافی عرصہ سے اسمبلی کے بغیر ہے۔ ایسے میں یہاں ہونے والے اسمبلی انتخابات کافی اہمیت کے حامل ہوں گے۔ بات چیت کے دوران غلام نبی آزاد نے کہا کہ ماضی میں جماعت اسلامی کا جموں وکشمیر مین اسٹریم سیاست میں اہم رول رہا ہے۔ ان کے یہاں اپنے ایم ایل بھی ہوا کرتے تھے۔ لیکن بعد میں وہ خود ہی بائیکاٹ کی پالیسی پر گامزن رہے۔ سرکار کی جانب سے پابندی نہ ہونے کے باوجود بھی وہ کئی دہائیوں سے انتخابی عمل سے دور رہتے تھے۔ اب اگر وہ آج کہتے ہیں کہ پابندی ہٹائی جائے ہم انتخابات میں حصہ لیں گے تو یہ واقعی خوش آئند بات ہے۔ اس طرح کوئی بھی جماعت خواہ کسی بھی مذہب یا مسلک سے تعلق کیوں نہ رکھتی ہو۔ مین اسٹریم سیاست میں آکر اگر وہ ملک و قوم کی خدمت کرنا چاہتے ہیں تو ان کے لیے دروازے کھلے رکھنے چاہیے۔
ایک سوال کے جواب میں انہوں نے کہا کہ چونکہ ہم نے کشمیر کی 3 پارلیمانی نشتوں پر صرف اپنے 2 امیدوار میدان میں اتارے ہیں تاہم شمالی کشمیر کی بارہمولہ سیٹ میں ہم نے مشاورت کے بعد جیل سے لڑ رہے عوامی اتحاد پارٹی کے انجینئر رشید کو حمایت کرنے کا فیصلہ کیا ہے۔ بات چیت کے دوران غلام نبی آزاد نے کہا کہ اے پی ڈی پی ایک نو زائد پارٹی ہے۔ ہم نے جموں وکشمیر کی پانچ سیٹوں کے بجائے 3 سیٹوں پر انتخابات لڑنے پر اکتفا کیا ہے اور اگر وقت پر چناوی نشان نہیں آتا تو شاید ہماری جماعت پارلیمانی انتخابات میں حصہ نہیں لیتی۔
غلام نبی آزاد نے کہا کہ مجھے خوشی اس بات کی ہے کہ میں نے کشمیر میں وہ دو نئے چہرے امیدوار کے طور پر میدان میں اتارے ہیں جن کی کسی پارٹی یا خاندانی سیاست سے دور دور سے بھی کوئی وابستگی نہیں ہے۔ وہیں آنے والے اسمبلی انتخابات میں بھی ڈی اے پی اے ان امیدواروں کو ترجیح دے گی جو کہ نئی سوچ کے ساتھ لوگوں کی خدمت کرنا چاہتے ہوں۔ سیاست میں نئے ہوں اور جن کا خاندانی سیاست سے کوئی بھی تعلق نہیں ہو۔
