سرینگر: شہرہ آفاق گلمرگ میں پیر کے روز برفانی تودا گر آنے کے نتیجے میں دو سیاح برف کے نیچے دب گئے، تاہم بروقت کارروائی کے نتیجے میں انہیں بحفاظت نکالا گیا۔
حکام نے بتایا کہ پیر کی دوپہر بارہ بجے افروٹ چوٹی پر بھاری برکم برفانی تودا گر آیا جس کے نتیجے میں وہاں سیکنگ کرنے والے دو سیاح برف کے نیچے دب گئے، چنانچہ سکائی پیٹرولنگ ٹیم کی قیادت کرنے والے غیر ملکی آفیسر’ برائن نیو مین‘ نے فوری طور پر ریسکیو آپریشن شروع کیا اور پانچ منٹ کے اندر اندر ٹیم جائے وقوع پر پہنچی۔
انہوں نے مزید بتایا کہ ٹیم نے برف میں پھنسے ہوئے سیاحوں کو زندہ باہر نکالنے میں کامیابی حاصل کی۔دریں اثنا گلمرگ میں اسکائنگ کرنے والے سیاحوں کو احتیاطی تدابیر پر من وعن عمل کرنے کی تلقین کی گئی ہے۔گنڈولہ کے جی تھری اسٹیشن سے آگے بڑھنے والے تمام سیاحوں (اسکائنگ کرنے والے )کے پاس تمام تر حفاظتی سامان ساتھ رکھنے کا بھی مشورہ دیا گیا ہے۔
مزید پڑھیں: آٹھ اضلاع میں برفانی تودے گر آنے کی وارننگ جاری
واضح رہے کہ جموں وکشمیر ڈزاسٹر مینجمنٹ اتھارٹی (جے کے ڈی ایم اے) نے خراب موسمی صورتحال کے پیش نظر جموں وکشمیر کے 8 اضلاع میں اگلے چوبیس گھنٹوں کے دوران برفانی تودے گر آنے کی وارننگ جاری کی ہے۔ حکام نے لوگوں سے احتیاط برتنے کی تاکید کی ہے اور جن علاقوں میں برفانی تودے گر آنے کے خطرات رہتے ہیں وہاں جانے سے اجتناب کرنے کو کہا ہے۔
(یو این آئی مشمولات کے ساتھ)
