اننت ناگ (جموں کشمیر): جنوبی کشمیر کے اننت ناگ ضلع میں گڈویل نامی ایک گاؤں کے باشندوں نے شکایت کی ہے کہ گزشتہ سال مرکزی معاونت والی ’’پردھان منتری آواس یوجنا‘‘ اسکیم کے تحت غریبوں کو مکان تعمیر کرنے کے لئے انہیں واگزار کئے گئے تھے، تاہم علاقے کے مستحق افراد کے بینک کھاتوں میں ابھی تک پہلی قسط بھی جمع نہیں کی گئی جس کے نتیجے میں غریب عوام عارضی شیڈ میں کسمپرسی کی زندگی گزار رہے ہیں۔
گڈویل، کوکرناگ علاقے کے ایک رہائشی مشتاق احمد نے میڈیا نمائندوں کے ساتھ بات کرتے ہوئے کہا کہ انہیں بھی علاقے کے دیگر غریب لوگوں کی طرح محکمہ دیہی ترقی نے مکان تعمیر کرنے کے لیے حکومتی اسکیم کے تحت رقم واگزار کیے جانے کی یقین دہانی کی گئی۔ مشتاق احمد کے مطابق انہوں نے بھی نئے آشیانے میں زندگی گزارنے کی آس میں اپنی کچا مکان منہدم کیا اور عارضی طور ایک شیڈ میں رہائش اختیار کی۔
مشتاق احمد کا دعویٰ ہے کہ انہوں نے قرض لیکر مکان کی تعمیر شروع کی جبکہ محکمہ کی جانب سے منظور شدہ اسکیم کے تحت قسط واگزار نہیں کی گئی۔ مشتاق احمد کے مطابق اسکیم کے اصولوں کے مطابق رقم قسطوں میں واگزار کی جاتی ہے جبکہ ان کی ایک بھی قسط واگزار نہیں کی گئی۔ انہوں نے محکمہ دیہی ترقی کو شدید تنقید کا نشانہ بناتے ہوئے کہا کہ ’’گزشتہ ایک سال سے محکمہ دیہی ترقی کے لارنو بلاک کے چکر لگا رہا ہوں تاہم ابھی تک میرے بینک کھاتے میں پہلی قسط بھی جمع نہیں کی گئی۔‘‘
انہوں نے محکمہ دیہی ترقی کے افسران کو شدید تنقید کا نشانہ بناتے ہوئے کہا: ’’محکمہ میں میرے نام سے رقم واگزار کی گئی ہے تاہم وہ میرے بینک کھاتے میں جمع نہیں ہوئی، کسی اور کے کھاتے میں جمع کی گئی ہے، جسے سدھارنے کے لیے محکمہ گزشتہ ایک سال سے صرف کاغذی گھوڑے دوڑانے میں مصروف عمل ہے۔ ‘‘ انہوں نے کہا کہ سال گزرنے کے باوجود ابھی تک اس کے کھاتے میں رقم جمع نہیں ہوئی۔ ادھر، نمائندے نے جب فون پر یہ مسئلہ بلاک ڈیولپمنٹ آفیسر لارنو، طارق احمد کی نوٹس میں لانے کی کوشش کی تو مذکورہ آفیسر نے نمائندے کے فون کال کا جواب دینا بھی مناسب نہیں سمجھا۔ دریں اثناء مقامی باشندوں نے ایل جی انتظامیہ سے اس معاملے کی چھان بین کرنے اور ان کی رقم کی واگزاری کو یقینی بنانے کی اپیل کی ہے تاکہ ایک مفلس شخص کی مشکلات دور ہو سکیں۔
یہ بھی پڑھیں: پلوامہ کا غریب خاندان پردھان منتری آواس یوجنا سے محرم
