شوپیان میں ووٹنگ کی اہمیت پر زور، ضلع انتظامیہ کی جانب سے آگاہی ریلی کا انعقاد - importance of voting

Voting Importance Campaign in Shopian: انتخابات کی اہمیت بتانے کے لیے وادی میں جگہ جگہ بیداری مہم چلائی جارہی ہے۔ شوپیاں ضلع انتظامیہ نے ووٹنگ کی اہمیت پر زور دیتے ہوئے ایک بیداری ریلی کا انعقاد کیا۔

شوپیان: ضلع شوپیان میں عوام کو ووٹنگ کے عمل اور اس کی اہمیت سے روشناس کروانے کے لیے ضلع انتظامیہ کی جانب سے ایک آگاہی پروگرام کا انعقاد کیا گیا، جس کے تحت قصبہ شوپیان کے مختلف بازاروں میں ایک بڑی ریلی نکالی گئی۔ اس ریلی کا مقصد عوام میں ووٹ ڈالنے کے عمل کی اہمیت کو اجاگر کرنا اور انہیں انتخابات میں بھرپور شرکت کرنے کی ترغیب دینا تھا۔

ریلی کی قیادت ڈسٹرکٹ الیکشن آفیسر شوپیان، شاہد سلیم نے کی، جنہوں نے عوام کو ووٹنگ کے حوالے سے آگاہ کرنے اور انہیں اس قومی فریضے میں حصہ لینے کے لیے بھرپور کردار ادا کرنے کے لیے آمادہ کیا۔ اس موقع پر ایس ایس پی شوپیان عنایت علی، ڈپٹی ڈسٹرکٹ الیکشن آفیسر جہانگیر احمد اور دیگر ضلع افسران بھی موجود تھے، جو اس مہم کو کامیاب بنانے کے لیے پیش پیش رہے۔ریلی گورنمنٹ بوائز ہائر سیکنڈری اسکول شوپیان سے شروع ہوکر مختلف بازاروں سے گزرتی ہوئی گول چوک شوپیان پر اختتام پذیر ہوئی۔ ریلی کے دوران عوام کو سویپ پروگرام کے مختلف پہلوؤں اور اس کے کردار کے بارے میں تفصیلی معلومات فراہم کی گئیں۔ ریلی میں شامل شرکاء نے عوام کو ووٹ کے حق کے استعمال کی اہمیت کے بارے میں آگاہ کیا اور انہیں اپنی ذمہ داریوں کا احساس دلایا۔

ریلی کے شرکاء نے مختلف بازاروں میں جا کر لوگوں سے ملاقات کی اور انہیں انتخابات میں حصہ لینے کی اہمیت پر زور دیا۔ عوام کو آگاہ کیا گیا کہ ووٹ ڈالنا نہ صرف ان کا حق ہے بلکہ یہ ان کی قومی ذمہ داری بھی ہے۔ ضلع انتظامیہ کی جانب سے اس آگاہی پروگرام کو عوامی حلقوں میں سراہا جا رہا ہے اور امید کی جا رہی ہے کہ اس مہم کے ذریعے آئندہ انتخابات میں عوام کی شرکت میں نمایاں اضافہ ہوگا۔