شوپیاں (جموں کشمیر) : جنوبی کشمیر کے شوپیاں ضلع میں گورنمنٹ مڈل اسکول بالا بوہری ہالن کی عمارت انتہائی خستہ ہو چکی ہے۔ بارشوں کے دوران چھت سے پانی ٹپکنے کی وجہ سے طلباء کو بار بار گھر واپس بھیجنا پڑتا ہے، جس سے والدین اپنے بچوں کے مستقبل کے تئیں کافی فکر مند ہیں۔ وہیں خستہ حال عمارت طلباء کی جانوں کے لیے سنگین خطرہ بھی بن چکی ہے۔
اسکول کی عمارت میں جگہ جگہ دراڑیں پڑ گئی ہیں وہیں اسکول کے صحن میں موجود دو دیودار کے درخت بھی تقریباً سوکھ چکے ہیں جو کسی بھی وقت گر کر بڑے حادثے کا موجب بن سکتے ہیں۔ طلبہ کا کہنا ہے کہ درخت طویل عرصہ قبل سوکھ چکے ہیں اور انہیں فوری طور پر کاٹ کر طلبہ کی زندگی کو محفوظ بنایا جانا چاہئے۔ طلبہ نے حکام سے فوری طور پر جدید عمارت تعمیر کیے جانے کی اپیل کی ہے۔
ادھر، اسکول کی کمپیوٹر لیب بھی غیر فعال ہے، جس سے طلباء کی تعلیم پر منفی اثرات مرتب ہو رہے ہیں۔ طلبہ کا کہنا ہے کہ ’’جدید دور میں کمپیوٹر کی تعلیم بنیادی حیثیت رکھتی ہے اور اس طرح کی صورتحال طلباء کے مستقبل کے لیے نقصان دہ ثابت ہو سکتی ہے۔‘‘ اسکول میں زیر تعلیم طلبہ اور ان کے والدین سمیت علاقہ کے ذی عزت شہریوں نے حکام سے مطالبہ کیا ہے کہ فوری طور پر اس مسئلے کا حل نکالا جائے تاکہ طلباء کی جان و مال محفوظ رہ سکے اور ساتھ ہی ان کی تعلیم کا سلسلہ بھی جاری رہ سکے۔
یہ بھی پڑھیں: Crack in the School Building نئی تعمیر شدہ اسکول عمارت میں شگاف، انتظامیہ سے توجہ دینے کی اپیل
