بانڈی پورہ (جموں کشمیر) : بارڈر سیکورٹی فورس (بی ایس ایف) نے شمالی کشمیر کے بانڈی پورہ ضلع میں ’’کیندریہ ودیالہ‘‘ کے طلباء کے ساتھ یوگا کا 10 واں بین الاقوامی دن جوش و خروش کے ساتھ منایا۔ اس موقع پر منعقدہ تقریب میں بی ایس ایف کے افسران، اہلکاروں کے علاوہ طلبہ کی خاصی تعداد نے شرکت کی اور جسمانی و ذہنی تندرستی کے لیے یوگا کے تئیں اپنے عزم کا اعادہ کیا۔
اس موقع کی مناسبت سے، سیکٹر ہیڈ کوارٹر بی ایس ایف، بانڈی پورہ نے ہیڈکوارٹر اور انڈر کمانڈ یونٹس بشمول فارورڈ لوکیشنز/ایل او سی پر بھی اجلاس کا اہتمام کیا گیا جس میں بی ایس ایف کے دستوں اور اسکولی بچوں نے شرکت کی۔ تقاریب کی قیادت سینئر افسران نے کی جنہوں نے جسمانی تندرستی، ذہنی اور روحانی توازن کو برقرار رکھنے میں یوگا کی اہمیت و افادیت پر روشنی ڈالی۔
بی ایس ایف اہلکاروں نے اپنے نظم و ضبط اور ہم آہنگی کو ظاہر کرتے ہوئے مختلف یوگا آسن، پرانایام کا مظاہرہ کیا۔ اس موقع پر بی ایس ایف افسران نے کہا کہ ’’یوگا ہمارے تربیتی معمولات کا ایک لازمی حصہ ہے۔ یہ ہمارے فورس کے اہلکاروں کو جسمانی اور ذہنی طور تندرست رہنے میں مدد کرتا ہے، جو ان کی کارکردگی کے لیے انتہائی ضروری ہے۔‘‘ یاد رہے کہ جموں کشمیر کے سبھی اضلاع میں سرکاری سطح پر یوگا تقاریب کا انعقاد عمل میں لایا گیا، جبکہ سرینگر میں منعقدہ تقریب میں وزیر اعظم نریندر مودی نے شرکت کی تاہم یہ تقریب بارش کی وجہ سے طے شدہ پروگرام کے مطابق انجام نہ دی جا سکی۔
