سرینگر: جموں وکشمیر اپنی پارٹی (اے پی) نے بھارتیہ جنتا پارٹی (بی جے پی) کی سخت مذمت کرتے ہوئے کہا: ’’بی جے پی، اسمبلی انتخابات سے قبل ہمارے پارٹی رہنماؤں کو متاثر کرنے کی کوشش کر رہی ہے۔ تاہم اپنی پارٹی، بی جے پی کے نظریہ کے خلاف دیوار کی طرح کھڑی رہے گی اور ان کے مذموم عزائم کو کامیاب ہونے نہیں دے گی۔‘‘
پیر کو اپنی پارٹی ترجمان منتظر محی الدین نے میڈیا نمائندوں سے بات چیت کے دوران بی جے پی پر سخت الزامات عائد کیے اور کہا: ’’بی جے پی نے جموں وکشمیر میں اسمبلی انتخابات سے قبل اپنی پارٹی کے رہنماؤں کو زعفران پارٹی کی صف میں شامل کرنے کے لیے متاثر کرنا شروع کر دیا ہے۔ لیکن ہم ان لوگوں سے پوچھنا چاہتے ہیں جو ہمیں بی جے پی کے پراکسی کہتے ہیں اگر ہم ان کے فرنٹ میں ہیں تو وہ عین انتخابات سے قبل ہمارے رہنماؤں کو ہم سے کیوں چین رہے ہیں۔ کیونکہ ہم بی جے پی کے نظریہ کے خلاف رہے ہیں، وجہ یہی ہے کہ وہ اپنی پارٹی کے خلاف سازش کر رہے ہیں۔‘‘
انہوں نے مزید کہا کہ شروع سے ہی ہمیں بی جے پی کی اے اور بی ٹیم کی لیبل لگائی گئی۔ تاہم ہم پہلے ہی واضح کر چکے ہیں کہ نہ تو ہم ماضی میں زعفران پارٹی سے وابستہ تھے اور نہ ہی مستقبل میں اس کا حصہ بن سکتے ہیں۔ منتظر محی الدین نے ای سی آئی کی جانب سے اسمبلی انتخابات کے اعلان کا خیر مقدم کرتے ہوئے کہا: ’’ہم مطمئن ہیں کہ اب الیکشن کے ذریعے لوگوں سے ملاقات کریں گے، ان کی داد سنیں گے کیونکہ لوگ اچھی طرح جانتے ہیں کہ جب دفعہ 370 کو منسوخ کر کے ہماری زمینوں اور ملازمتوں کے حقوق کو خطرے میں ڈال دیا گیا تو یہ اس وقت اپنی پارٹی ہی تھی جس نے وزیر اعظم نریندر مودی اور وزیر داخلہ امیت شاہ سے ملاقات کی اور جموں وکشمیر کے لوگوں کے خدشات کو اجاگر کیا۔‘‘
