بی جے پی کی اے، بی، سی اور ڈی ٹیموں سے ہوشیار رہنے کی ضرورت، ڈاکٹر فاروق عبداللہ

نیشسل کانفرنس کے صدر ڈاکٹر فاروق عبداللہ نے کہا کہ پارٹی کے بنیادی موقف میں ذرا برابر بھی فرق نہیں آیا ہے۔ انہوں نے کہا کہ موقعہ پرست اور مفاد پرست عناصر کشمیریوں کے ہمدرد ہونے کا لبادہ اوڑھ کر کشمیر دشمنوں کے خاکوں میں رنگ بھر رہے ہیں۔

سرینگر: جموں وکشمیر نیشنل کانفرنس کے صدر ڈاکٹر فاروق عبداللہ نے جمعرات کے روز کہا کہ پارٹی کے بنیادی موقف میں ذرا برابر بھی فرق نہیں آیا ہے۔انہوں نے کہا کہ عوام کو بھاجپا کی اے، بی ، سی اور ڈی ٹیموں سے ہوشیار رہنے کی ضرورت ہے۔

ان باتوں کا اظہار موصوف نے پارٹی ہیڈکواٹر پر منعقدہ ایک اجلاس سے خطاب کے دوران کیا۔
ڈاکٹر فاروق عبداللہ نے کہاکہ نیشنل کانفرنس جموں و کشمیر میں امن و استحکام کی بحالی اور تعمیر و ترقی کیلئے کام کیا ہے اور انشاء اللہ آگے بھی کریگی اور ہر سطح پر لوگوں کی راحت رسانی کیلئے پیش پیش رہے گی۔

انہوں نے کہا کہ عوام کی ہر حال میں خدمت کرنا نیشنل کانفرنس کا بنیادی اصول رہا ہے اور پارٹی آج بھی اپنے سنہری اصولوں پر کار بند ہے۔ مرحوم شیخ محمد عبداللہ کی اس جماعت نے ہمیشہ عوام کو ہی طاقت کا سرچشمہ ماناہے اور آج بھی مانتی ہے۔

ان کا مزید کہنا تھا کہ عوامی اشتراک اور تعاون کے بغیر پارٹی کا کوئی وجود نہیں، ہمیں ہر حال میں لوگوں کے ساتھ قریبی رابطہ رکھنے کی ضرورت ہے۔

ڈاکٹر فاروق عبداللہ نے پارٹی سے وابستہ لیڈران، عہدیدارن اور کارکنان پر زور دیا کہ جموں وکشمیر کے دشمنوں کے پروپیگنڈا اور نیشنل کانفرنس کیخلاف پھیلائے جارہے جھوٹے بیانیہ کا توڑ کرنے کیلئے مستعدد اور متحرک ہوجائیں۔

انہوں نے کہا کہ نیشنل کانفرنس کے بنیادی موقف میں ذرا برابر بھی فرق نہیں آیا ہے۔ انہوں نے کہا کہ موقعہ پرست اور مفاد پرست عناصر کشمیریوں کے ہمدرد ہونے کا لبادہ اوڑھ کر کشمیر دشمنوں کے خاکوں میں رنگ بھر رہے ہیں۔ عوام کو بھاجپا کی اے، بی ، سی اور ڈی ٹیموں سے ہوشیار رہنے کی ضرورت ہے۔

(یو این آئی)