جموں وکشمیر کے ضلع اننت ناگ میں عوامی اتحادی پارٹی کی جانب سے ایک عوامی جسلہ منعقد ہو رہا ہے ،جس میں پارٹی کے سرپرست انجینئر رشید شرکت کر رہے ہیں ،جبکہ لوگوں کی بڑی تعداد بھی اسپورٹس اسٹیڈیم میں منعقدہ جلسے میں موجود ہیں۔
عوامی اتحاد پارٹی(اے آئی پی) کے سرپرست انجینئر رشید کے بیٹے ابرار رشید نے کہا کہ جس طرح سے ان کی پارٹی کو شمالی کشمیر میں لوگوں کا تعاون مل رہا ہے امید ہے کہ انہیں جنوبی کشمیر میں بھی اسی طرح عوام کی حمایت حاصل ہو گی۔
انہوں نے کہا کہ عوامی اتحاد پارٹی ایک عوامی پارٹی ہے اور اسے عوام کا بھرپور تعاون حاصل ہے ۔ابرار نے کہا کہ ان کے والد پانچ برس سے زائد جیل میں رہے اس کے باوجود بھی ان کے لہجے ،جذبات اور خیالات میں کمی نہیں آئی، انہوں نے کہا کہ وہ پورے جموں کشمیر میں اپنے منشور پر کاربند ہیں۔
مزید پڑھیں: مودی سرکار کو مسئلہ کشمیر پرامن طریقے سے حل کرنے پر مجبور کروں گا: انجینئر رشید - Engineer Rashid PC
اننت ناگ میں منعقدہ ایک عوامی جسلے کے دوران میڈیا سے بات کرتے ہوئے ابرار نے کہا کہ ان کی پارٹی پر جو سیاست دان مختلف طرح کے الزامات لگا رہے ہیں وہ بوکھلاہٹ کا شکار ہیں،وہ لوگوں کو اصل سیاست سے دور رکھنے کی کوشش کرتے ہیں،کیونکہ انہوں نے ہمیشہ یہاں کے لوگوں کو پس پشت چھوڑ کر اپنا سیاسی ایجنڈہ چلایا ہے ،لیکن عوامی اتحاد پارٹی کرسی کی بھوکی نہیں ہے، یہ ایک عوامی تحریک ہے اور یہ تحریک جموں کشمیر کی ترقی خوشحالی اور امن کی بحالی کے لئے جاری ہے۔
