سوپور( بارہمولہ): شمالی کشمیر کے ضلع بارہمولہ کے سوپور ڈاک بنگلہ میں آج نیشنل کانفرنس کی جانب سے ورکرس کنونشن کا انعقاد کیا گیا، جس میں ہزاروں کی تعداد میں مختلف علاقوں سے آئے ہوئے نیشنل کانفرنس کے کارکنان نے شرکت کی۔ اس دوران نیشنل کانفرنس کے سینیئر رہنما عمر عبداللہ کے علاوہ پارٹی کے دیگر اہم لیڈر بھی موجود رہے۔
عمر عبداللہ نے اپنے خطاب میں کہا کہ 'اگر ہم سوپور قصبہ کی بات کریں تو یہاں پر ایشیا کی دوسری سب سے بڑی فروٹ منڈی ہے اور اس منڈی کی طرف مرکزی سرکار نے کوئی دھیان نہیں دیا۔ انہوں نے کہا کہ ملک میں بیروں ممالک سے سیب آتے ہیں اور ان کو ہی ترجحی دی جاتی ہے لیکن جو ہمارے خود کے سیب ہیں ان پر ایکسپورٹ ڈیوٹی لگائی جاتی ہے۔
میڈیا سے بات کرتے ہوئے عمر عبداللہ نے کہا کہ 'اس غلط فہمی میں مت رہیے کہ وزیر داخلہ نے افسپا ہٹانے کا اعلان کیا ہے۔ انہوں نے اس کے ہٹانے پر غور کرنے کی بات کی ہے۔ افسوس کی بات ہے کہ ان کو اب اس پر غور کرنے کی بات یاد آئی'۔ انہوں نے کہا کہ 'مجھے ڈر اس بات کا ہے کہ جس طرح لداخ کو ہل کونسل انتخابات کے بعد چھٹا شیڈول دینے کا وعدہ کرکے دھوکہ دیا گیا، کہیں ہمارے ساتھ بھی ایسا ہی نہ ہو'۔
ان کا کہنا تھا کہ 'پارلیمانی انتخابات ہوں گے تو بی جے پی کو جموں و کشمیر کی پانچوں سیٹوں پر شکست ملے گی پھر وہ افسپا بھول جائیں گے'۔
مزید پڑھیں:
- "افسپا" کو ہٹانا صرف جملہ بازی تک محدود نہیں رکھا جانا چاہیے، محبوبہ مفتی
- اب افسپا کے نام پر کشمیریوں کو دھوکہ دیا جا رہا ہے: عمر عبدللہ
انڈیا الائنس کے بارے میں پوچھے جانے پر عمر نے کہا کہ 'ہم انڈیا الائنس کا حصہ ہیں اور آگے بھی رہیں گے'۔ انہوں نے کہا کہ انتخابات میں کامیابی کے بعد ہم پارلیمنٹ میں لوگوں کے جذبات کی ترجمانی کریں گے'۔ انہوں نے کہا کہ آنے والے وقت میں نیشنل کانفرنس کشمیر میں پارلیمانی انتخابات میں نمایاں کارکردگی دکھائی گی، کیونکہ جو آج یہاں پروگرام میں لوگوں کی تعداد تھی اس سے پتہ چلتا ہے کہ نیشنل کانفرنس انتخابات میں کامیاب ہوگی۔
