سری نگر: جموں و کشمیر انتظامیہ کی طرف سے فراہم کردہ سخت حفاظتی انتظامات کے درمیان آج دوسرے دن تقریباً 6619 یاتری جموں و کشمیر کے پہلگام اور بالتل راستوں سے مقدس امرناتھ غار کے لیے روانہ ہوئے۔ پہلے دن لگ بھگ 13000 یاتریوں نے امرناتھ غار کے درشن کیے۔
#WATCH | Srinagar, J&K: Amid tightened security, another batch of pilgrims leave for Amarnath Yatra from Pantha Chowk base camp. pic.twitter.com/IJd6KRw0Tz
— ANI (@ANI) June 30, 2024
یاتریوں میں 18 بچے، 5144 مرد، 1141 خواتین، 241 سادھو شامل ہیں۔ حکام کے مطابق اننت ناگ ضلع میں پہلگام جانے والے یاتریوں کی تعداد 3838 تھی جبکہ 2781 یاتریوں نے گاندربل ضلع کے سونمرگ سے بالتل کا راستہ اختیار کیا۔
عہدیداروں نے بتایا کہ یاتریوں کی قیادت سی آر پی ایف اور ڈی وائی ایس پی رینک کے پولیس عہدیداروں نے کی جبکہ دونوں راستوں پر سیکورٹی کے سخت انتظامات کئے گئے ہیں۔
یاترا 29 جون کو سخت سیکورٹی اور انتظامات کے درمیان شروع ہوئی تھی۔ جموں و کشمیر کے لیفٹیننٹ گورنر منوج سنہا نے 28 جون کی صبح جموں کے بھگوتی نگر یاتری نواس سے یاتریوں کے پہلے جتھے کو جھنڈی دکھا کر روانہ کیا تھا۔
کشمیر میں، یاتریوں کو پہلگام کے ننوان بیس کیمپ میں ٹھہرایا جاتا ہے جبکہ سونمرگ میں یاتری بالتل بیس کیمپ سے روانہ ہوتے ہیں۔ سری نگر میں انتظامیہ نے پنتھا چوک بس اسٹینڈ کو یاتریوں کے قیام کے لیے مختص کیا ہے۔
ان بیس کیمپوں پر سیکورٹی کے سخت انتظامات کیے گئے ہیں جبکہ انتظامیہ نے امرناتھ گپھا کی طرف روانگی سے قبل ان اسٹیشنوں پر آرام کرنے والے یاتریوں کے لیے طبی، بجلی، پانی اور صفائی سمیت تمام بنیادی سہولیات کے انتظام کیے ہیں۔ انتظامیہ ان کیمپوں میں یاتریوں کا اندراج کرتی ہے اور انہیں سرکاری طور پر مقرر کردہ بسوں اور گاڑیوں کے ذریعے بالتل یا پہلگام بیس کیمپ بھیجتی ہے۔
جموں و کشمیر انتظامیہ نے اپنے درجنوں اہلکاروں کو ان کیمپوں میں یاتریوں کے رجسٹریشن، نقل و حرکت میں سہولت فراہم کرنے اور ان کی صحت اور بنیادی ضروریات کو پورا کرنے کے لیے تعینات کیا ہے۔ سیکورٹی وجوہات کی بنا پر کسی شہری کو ان کیمپوں میں داخل ہونے کی اجازت نہیں ہے۔
29 جون کو شروع ہونے والی 52 روزہ یاترا 19 اگست کو اختتام پذیر ہوگی۔ 3880 میٹر کی بلندی پر واقع امرناتھ غار میں ان 52 دنوں کے دوران لاکھوں یاتری آتے ہیں، جو غار میں بابا برفانی کی پوجا کرتے ہیں۔
شری امرناتھ شرائن بورڈ کے زیر انتظام، یاترا کو جے کے حکومت بھی سہولت فراہم کرتی ہے جبکہ مرکزی حکومت یاترا کے لیے سیکورٹی فراہم کرتی ہے۔ روایتی طور پر، یاترا کو صرف پہلگام کے راستے سے نکالا جاتا تھا لیکن مزید یاتریوں کی سہولت کے لیے سونمرگ سے بالتل کے راستے کو شامل کیا گیا تھا۔
یہ بھی پڑھیں:
