سرینگر: کشمیر میں 40 دنوں پر محیط سردیوں کا بادشاہ ’’چلہ کلان‘‘ پہاڑی علاقوں میں ہلکی برفباری اور میدانی علاقوں میں مجموعی طور خشک موسم کے بیچ ایک سال کے لیے رخصت ہو گیا۔ اب وادی کشمیر کے لوگوں کو یکم مارچ تک ’’چلہ خورد‘‘ اور ’’چلہ بچہ‘‘ (کی سردیوں) کا سامنا کرنا پڑے گا۔ اس بار چلہ کلان زیادہ پریشان کن نہیں رہا۔ 40 دنوں کے دوران پہاڑی اور سیاحتی مقامات پر برف باری کے نشان چھوڑ کر ہی چلہ کلان رخصت ہوا۔ تاہم میدانی علاقے برفباری سے اس دورانیہ میں محروم ہی رہے۔ دو ماہ کے طویل خشک موسم کے بیچ اتوار کی سہ پہر سے بالائی علاقے ہلکی برفباری اور میدانی علاقے بارش سے تر ہو گئے۔
وادی کشمیر میں ’’چلہ کلان‘‘ کے دوران نہ صرف مقامی باشندے بلکہ یہاں موجود سیاح بھی برف باری کا بے صبری سے انتظار کر رہے تھے۔ ایسے میں سیاحتی مقام خاص کر گلمرگ میں تازہ برفباری سے سیاحوں کو لطف اندوز ہوتے ہوئے دیکھا گیا جس کے لیے وہ عرصہ دراز سے منتظر تھے۔ ’’چلہ کلان‘‘ کے دوران کشمیر میں اگرچہ موسم مجموعی طور خشک رہنے کے ساتھ ساتھ دن کے دوران ہلکی دھوپ بھی چھائی رہی، تاہم دوران شب ٹھٹھرتی سردی کا راج برابر جاری رہا اور گرمائی دارالحکومت سرینگر میں رات کا کم سے کم درجہ حرارت منفی 5 ڈگری درج کیا گیا۔
ماہرین کے مطابق اگرچہ اس سے قبل بھی ’’چلہ کلان‘‘ خشک رہا ہے اور رواں سیزن کے دوران یہ دورانیہ (چلہ کلان) خشک رہنے کے نتیجے میں یہاں کے آبی ذخائر میں پانی کی سطح میں کافی کمی واقع ہوئی ہے جس سے لوگوں خاص کر کسان طبقے میں گونا گوں خدشات پیدا ہوئے ہیں۔ اس دوران برف و باراں کی خاطر وادی کشمیر کے لوگوں نے ’’نماز استسقاء‘‘ کا بھی اہتمام کیا۔ اللہ تبارک وتعالیٰ کے حضور سربسجود ہوکر لوگوں نے اپنی خطاؤں اور گناہوں کی معافی بھی طلب کی۔
مزید پڑھیں: کپواڑہ اور گاندربل میں برفانی تودے گر آنے کی وارننگ جاری
محکمہ موسمیات کی پیشن گوئی کے مطابق وادی کشمیر میں مغربی ہواؤں کے داخل ہونے کے پیش نظر 30 اور 31 جنوری کو وادی کے بالائی علاقوں میں ہلکی سے درمیانہ درجے کی برفباری ہو سکتی ہے جبکہ یکم سے 4 فروری تک میدانی علاقوں میں ہلکی برف باری یا بارشوں کا امکان ظاہر کیا گیا ہے۔
ادھر 29 اور 30 کی درمیانی شب سرینگر میں رات کا کم سے کم درجہ حرارت 0.8 ڈگری سیلشیش ریکارڈ کیا گیا۔ سیاحتی مقام پہلگام میں منفی 3.3 ڈگری جبکہ گلمرگ میں رات کا کم سے کم درجہ حرارت منفی 6 ڈگری سیلشیس درج کیا گیا۔ واضح رہے کہ وادی کشمیر میں سخت سردی کے 40 دنوں پر محیط ’’چلہ کلان‘‘ کے بعد سردیوں کا دوسرا اور تیسرا مرحلہ شروع ہو رہا، جس میں 20 روزہ ’’چلہ خورد‘‘ اور 10 روز ’’چلہ بچہ‘‘ شامل ہیں اور یکم مارچ سے فصل بہار شروع ہوتی ہے۔
