ماسکو: روس کا ایک فوجی ٹرانسپورٹ طیارہ جس میں 65 یوکرینی جنگی قیدی، چھ عملہ اور ان کے ساتھ تین افراد سوار تھے، بدھ کی صبح یوکرین کے قریب روس کے بلغراد علاقے میں گر کر تباہ ہوگیا۔ جس کے نتیجے میں تمام افراد ہلاک ہوگئے۔ روس کی وزارت دفاع نے اس کی اطلاع دی۔ ابھی تک فوری طور پر یہ واضح نہیں ہوسکا کہ حادثے کی وجہ کیا رہی ہے۔
وزارت دفاع نے کہا کہ حکام حادثے کی وجہ کی تحقیقات کر رہے ہیں، اور ایک خصوصی فوجی کمیشن جائے حادثہ پر جا رہا ہے۔ میڈیا رپورٹ کے مطابق طیارے میں 65 یوکرینی فوجی قیدی سوار تھے جنہیں تبادلے کے لیے بلغراد کے علاقے میں لے جایا جا رہا تھا۔ یوکرین کے جنرل اسٹاف نے کہا کہ طیارہ روس کےایس - 300 فضائی دفاعی نظام کے لیے میزائل لے جا رہا تھا۔ اس میں جنگی قیدیوں کا کوئی ذکر نہیں تھا۔
اس سے قبل یوکرین کے بعض میڈیا نے خبر دی تھی کہ یوکرینی فورسز نے ایک روسی فوجی طیارے کو مار گرایا تھا تاہم بعد میں ان اطلاعات کو ہٹا دیا گیا تھا۔ بلغراد کے علاقائی گورنر ویاچیسلاؤ گلادکوف نے کہا کہ وہ اس واقعے سے باخبر ہیں، لیکن انہوں نے مزید تفصیلات نہیں بتائیں۔
سوشل میڈیا پر شیئر کی گئی ویڈیو میں مقامی وقت کے مطابق رات 11 بجے کے قریب بلغراد کے شمال مشرق میں یابلونووو کے قریب دھماکے کے بعد ایک طیارہ گرتے ہوئے نظر آرہا ہے۔ حادثے کا شکار ہونے والا فوجی طیارہ سوویت ڈیزائن کردہ ایک فوجی ٹرانسپورٹ طیارہ ہے جو فوجیوں، کارگو، فوجی سازوسامان اور ہتھیاروں کو لے جانے کے لیے استعمال ہوتا ہے۔
یہ بھی پڑھیں
