فلسطین پر سمجھوتہ کرنے سے انکار، آسٹریلیا کی مسلم خاتون سینیٹر کا استعفیٰ - Fatima Payman quits Party

آسٹریلیا کی باحجاب مسلم سینیٹر فاطمہ پیماں نے حکمراں جماعت لیبر پارٹی سے یہ کہہ کر استعفیٰ دے دیا کہ میرا خاندان جنگ زدہ ملک افغانستان سے بھاگ کر یہاں اس لیے نہیں آیا تھا کہ میں معصوم لوگوں پر ڈھائے جانے والے مظالم کو دیکھ کر خاموش رہوں۔ فاطمہ پیماں اب آزاد حیثیت سے سینیٹ میں موجود رہیں گی۔

آسٹریلیا کی سینیٹر فاطمہ پیمان نے حکمراں جماعت لیبر پارٹی سے استعفیٰ دے دیا ہے۔ انھوں نے جمعرات کو ایک نیوز کانفرنس میں بتایا کہ وہ آسٹریلیا کی حکمراں جماعت سے بھاری دل کے ساتھ استعفی دے رہی ہیں۔

اس سے پہلے حکمراں جماعت لیبر پارٹی نے انہیں پارٹی لائن کے خلاف ورزی کرنے اور پارلیمنٹ میں فلسطینیوں کو تسلیم کرنے کی کسی بھی تحریک کی حمایت میں ووٹ کرنے پر غیر معینہ مدت کے لیے معطل کر دیا تھا۔

مغربی آسٹریلیا کی ریاست کی نمائندگی کرنے والی فاطمہ پیماں نے جون کے آخر میں لیبر پارٹی اور وزیر اعظم انتھونی البانیس کی مرضی کے خلاف، فلسطین کو تسلیم کرنے کے لیے اپوزیشن پارٹی کی طرف سے پیش کی گئی تحریک کی حمایت میں ووٹ دیا تھا۔

فاطمہ نے جمعرات کی نیوز کانفرنس میں کہا کہ اسرائیلی حملوں کی وجہ سے ہم سب نے چھوٹے بچوں کی خون آلود تصاویر دیکھی ہیں اور ان کو وہاں بھوک سے مرتے ہوئے دیکھ رہے ہیں۔ انہوں نے یہ بھی کہا کہ میرا خاندان جنگ زدہ ملک افغانستان سے بھاگ کر یہاں پناہ گزین کے طور پر اس لیے نہیں آیا تھا کہ میں معصوم لوگوں پر ڈھائے جانے والے مظالم کو دیکھ کر بھی خاموش رہوں۔