ممبئی: اپنے پچھلے سیزن کی کامیابی کی بنیاد پر مقبول سیریز مرزا پور نے اپنے تیسرے سیزن کے ساتھ نئی بلندیوں کو چھو لیا ہے، جو مقامی اور عالمی سطح پر مقبول ہوا ہے۔ اس شدید کرائم ڈرامے نے اپنے لانچ ویک اِنڈ پر بھارت میں پرائم ویڈیو کی تاریخ میں سب سے زیادہ دیکھے جانے والے شو کے طور پر ایک ریکارڈ بنایا ہے۔
غور طلب ہے کہ اس شو نے زبردست عالمی کامیابی حاصل کی ہے، اپنے آغاز کے اختتامی ہفتہ پر یہ شو بھارت، امریکہ، برطانیہ، کینیڈا، آسٹریلیا، متحدہ عرب امارات، سنگاپور اور ملائیشیا سمیت 85 سے زائد ممالک میں 'ٹاپ 10' کی فہرست میں شامل ہو چکا ہے۔ آپ کو بتاتے چلیں کہ مرزا پور سیزن 3 کی کامیابی کے بعد پرائم ویڈیو شو کے سیزن 4 پر بھی کام کر رہی ہے۔
اس مقبول سیریز کے تیسرے سیزن کو ہندوستان اور پوری دنیا کے ناظرین نے بہت پسند کیا ہے۔ شو کی طاقتور اسٹوری ٹیلنگ، اعلیٰ درجے کی سینماٹوگرافی، اعلیٰ پروڈکشن اقدار اور زبردست پرفارمنس نے سب کو اپنا دیوانہ بنا دیا ہے۔ اس سیریز کو 180 سے زیادہ ممالک اور 98 فیصد ہندوستان کے پن کوڈز میں پرائم ویڈیو پر اپنے لانچ کے اختتامی ہفتہ کے دوران دیکھا گیا۔
اس کی کامیابی پر تبصرہ کرتے ہوئے پرائم ویڈیو کے ہیڈ آف انڈیا اوریجنلز نکھل مدھوک نے کہا کہ یہ ایک ہیٹ ٹرک ہے، مرزا پور فرنچائز کا تیسرا سیزن لانچ کے اختتام پر پرائم ویڈیو انڈیا پر سب سے زیادہ دیکھا جانے والا شو بن گیا ہے۔ اس کامیابی نے سیزن 2 سمیت تمام سابقہ ریکارڈ توڑ دیے ہیں، یہ ظاہر کرتی ہے کہ سامعین شو کے کرداروں سے کتنا جڑے ہوئے محسوس کرتے ہیں۔
نکھل مدھوک کا مزید کہنا ہے کہ ہم اس بڑی کامیابی کو ان شائقین کے ساتھ شیئر کرنے کے لیے پرجوش ہیں، جنہوں نے اس سیریز کو اتنا مشہور اور پسندیدہ بنایا ہے۔ یہ کامیابی ایکسل میڈیا اینڈ انٹرٹینمنٹ کے ساتھ ہماری مضبوط شراکت اور کاسٹ اور عملے کی محنت کے بغیر ممکن نہیں تھی۔ مداحوں کی تعداد میں اضافہ دیکھ کر نہ صرف خوشی ہوتی ہے بلکہ جوش بھی آتا ہے۔
ایکسل میڈیا اور انٹرٹینمنٹ کے ذریعہ تیار کردہ مرزا پور سیزن 3 کی ہدایت کاری گرمیت سنگھ اور آنند آئیر نے کی ہے۔ اس سیزن میں پنکج ترپاٹھی، علی فضل، شویتا ترپاٹھی شرما، رسیکا دوگل، وجے ورما، ایشا تلوار، انجم شرما، پریانشو پینیولی، ہرشیتا شیکھر گوڑ، راجیش تیلانگ، شیبا چڈھا، میگھنا ملک اور منو رشی چڈھا جیسے کئی عظیم اداکار شامل ہیں۔ دس اقساط پر مشتمل سیریز اب خصوصی طور پر پرائم ویڈیو پر ہندوستان اور دنیا بھر کے 240 ممالک اور خطوں میں چل رہی ہے۔
