پریاگ راج: الہ آباد ہائی کورٹ نے کہا کہ لیو ان پارٹنرز اور جتنے قانونی طور پر شادی شدہ بین المذاہب جوڑے ہیں وہ اتر پردیش پرہیبیشن آف ان لاء فل کنورژن آف ریلیجن ایکٹ 2021 (انسداد غیر قانون تبدیلی مذہب ایکٹ) کی دفعات کے پابند ہیں۔
ہائی کورٹ نے کہا کہ جو جوڑا 'لائیو ان پارٹنر' کے طور پر آریہ سماج کی رسومات کے ذریعے شادی کرتا ہے اسے رجسٹریشن کے قائم کردہ طریقہ کار سے گزرنا چاہیے۔ الہ آباد ہائی کورٹ میں ایک 24 سالہ مسلم خاتون اور ایک 23 سالہ ہندو شخص نے اپنی 'زندگی اور آزادی' کے تحفظ کی درخواست کی تھی، یہ بتاتے ہوئے کہ شادی کے اندراج کے لیے ان کی ای-درخواست زیر التوا ہے۔
جسٹس رینو اگروال نے کہا کہ چونکہ درخواست گزاروں کے اہل خانہ نے کوئی شکایت درج نہیں کرائی ہے، اس لیے ان کے رشتے کو کوئی چیلنج نہیں ہے۔ ہائی کورٹ نے تبدیلی مذہب مخالف قانون کی پابندی نہ کرنے پر جوڑے کے تحفظ کی درخواست کو مسترد کر دیا۔
اترپردیش حکومت نے بھی اس درخواست کی مخالفت کرتے ہوئے کہا کہ انہوں نے مذہب کی تبدیلی کے لیے کبھی درخواست نہیں دی۔ حکومت نے دلیل دی کہ ہندو میرج ایکٹ کے تحت ایک مسلم عورت آریہ سماج کی رسومات کے ذریعے ہندو مرد سے شادی نہیں کر سکتی۔
یہ بھی پڑھیں:
- ہماچل پردیش کے منڈی ضلع میں مبینہ لو جہاد کا واقعہ
- بہار میں لو جہاد کیس میں ایک شخص گرفتار
- مسلم نوجوان پر حملہ کرنے کے الزام میں وی ایچ پی کے سات کارکن گرفتار
لائیو ان پارٹنر کے طور پر ان کی حیثیت پر غور کرتے ہوئے ہائی کورٹ نے کہا کہ تبدیلی مذہب مخالف قانون نہ صرف بین المذاہب شادی کے معاملات میں بلکہ "شادی کی نوعیت کے رشتے میں بھی" مذہب کی تبدیلی کے لیے درخواست دینے کا حکم دیتا ہے۔ ہائی کورٹ نے کہا کہ "لہذا یہ مناسب نہیں سمجھا جاتا ہے کہ مقننہ کے ذریعہ منظور کردہ قانون کی دفعات کی خلاف ورزی کرتے ہوئے درخواست گزاروں کے تعلقات کو محفوظ کیا جائے۔"
